Hepe sa tanod gidakop kay dagha'g armas
CEBU, Philippines - Gisikop sa kapulisan ang hepe sa tanod tungod sa paghupot og daghang armas nga walay lisensya diha sa ilang balay sa barangay Lamac lungsod sa Pinamungahan kagahapon sa buntag.
Ang nadakpan mao si Rene Echavez alyas Reno Ebanez, 47, hepe sa tanod sa naasoy’ng lugar miangkon nga iya rang gitagoan sa balay ang upat ka nagkalain-laing armas isip proteksyon sa iyang kaugalingon isip usa ka hepe sa tanod.
Matud ni Echavez wala siya masayod si kinsa ang mi-report sa kapulisan nga may daghan siyang armas sa balay sanglit wala man unta siya’y kontra sa ilang lugar.
Apan si Chief Inspector Herman Mallari kinsa maoy nangulo sa operasyon sakop sa Criminal Investigation and Detection Group (CIDG)-7 kagahapon sa buntag nagkanayon nga nakadawat sila og reports nga si Echavez kanunay’ng magdala og armas gawas sa iyang pinuy-anan hinungdan nga ilaha kining giaplayan og search warrant sa korte.
Ang CIDG nga armado og search warrant nga giisyu ni Regional Trial Court (RTC) Judge Ruben Altubar sa branch 29 sa dakbayan sa Toledo City ilang giadto ang balay sa suspek.
Nakuha gikan sa balay niini ang usa ka .45, pistol, .357 caliber revolver, .38 caliber revolver, homemade shotgun, homemade caliber 7.62 rifle ug pipila ka magazines ug mga bala.
Sa interbyu ni Echavez sa mga tigbalita giangkon niyang walay lisensya ang maong mga armas ug iyaha lang kining pang-proteksyon.
Si Echavez anaa karun gitanggong sa CIDG-7 detention samtang gihikay pa sa kapulisan ang kasong ipasaka batok kaniya nga kalapasan sa RA 8294 or illegal possession of unlicensed firearms. (BANATNEWS)
- Latest
- Trending
