CEBU, Philippines - Patay ang usa ka 19-anyos nga ulitawo human kini matagak sa gisakyang motorsiklo ug nalatayan ug naguyod sulod pipila ka metros sa nagsunod kanilang sakyanan diha sa highway sa barangay Poog siyudad sa Toledo alas 5:50 niadtong Miyerkules sa hapon. Maayong pagkagusbat sa lawas ni Junrel Mahusay,19, nga usa ka lending collector nga nagpuyo sa maong lugar kinsa nag -angkas sa motorsiklo nga gimaneho ni Ronnel Ravanes, 22.
Sumala pa sa imbestigasyon nga sa wala pa ang aksidente una nang gikabanggaanay sa ilang motorsiklo ang gikasugat nga laing motorsiklo nga gimaneho ni Renante Maasin,32, taga Sagay Toledo City.
Samtang ang nakaligis kang Mahusay mao ang service bus sa Gallo Mining and Heavy Equipment Company nga kontraktor sa Carmen Copper Mining sa Atlas Toledo nga gimaneho ni Vicente Gentallan, 42, taga Poog, Toledo City.
Subay sa inisyal nga imbestigasyon sa traffic police sa kapulisan sa Toledo ang service bus paingon sa Lutopan ug niadtong tungora kalit gi-overtake-an ni Maasin apan wala kini makabantay sa gikasugat nga motorsiklong giluwanan sa biktima hinungdan sa ilang panagbangga.
Atol sa hitabo nalabay ang nag-angkas nga si Mahusay taliwa sa karsada dungan sa pagkatumba sa duha ka nagsabong nga motor apan wala kini swerte nga nalatayan kini sa luyong ligid sa nagsunod nga bus.
Matud pa sa mga imbestigador wala dayon maka-brake ang bus maong naguroy gyud og walo ka metros si Mahusay hinungdan sa pagkagusbat sa lawas niini.
Daling gitabang ug gidala sa Carmen Copper Hospital si Mahusay ingon man Ravanes kinsa naangol usab apan gideklarar nga dead on arrival si Mahusay.
Si Maasin ug Gentallan parehong gitanggong sa kapolisan sa Toledo samtang nagpadayon ang imbestigasyon. (BANATNEWS)