Relic ni Saint John gidala sa Cebu City Hall

CEBU, Philippines - Gidala kagahapon sa buntag diha sa Plaza Sugbo ang relic ni St. John the Baptist nga madasigong gisugat sa mga empleyado sa City Hall.

Ang maong relic una nga gidala sa Lutopan sa dakbayan sa Toledo niadtong Nobiyembre 8 ug gikatakda nga dalhon karong adlawa paingon sa De La Salle John Bosco College sa Bislig, Surigao del Sur.

Sumala pa sa usa sa mga sakop sa komitiba sa maong kalihukan nga si Rey Martinez ang maong relic mobisita pa sa 17 ka mga unibersidad sa tibuok nasud ug kabahin kini sa ika-100 nga anibersaryo sa De La Salle Philippines (DLSP) Inc.

Matud pa ni Martinez nga ubay-ubay na nga mga milagro ang nahatag sa maong relic sukad sa pagbisita niini sa Pilipinas.

Ang maong relic hatagan og military honors karong adlawa sa Mactan Airbase sa dili pa kini dad-on didto sa Surigao.

Matud pa niya nga si St. John maoy Santos sa mga magtutudlo hinungdan nga mga eskwelahan ang kasagaran nga bisitahon sa iyang relic.

Dugang pa niya nga niadtong buhi pa si St. John, nagpatukod kini og mga tunghaan alang sa mga kabos nga bata gumikan kay importante kaayo ang edukasyon alang sa kaugmaon sa mga tawo. (BANATNEWS)