Sakop sa akrho giagtang pagpusil

CEBU, Philippines - Patay ang usa ka 48-anyos nga lalaki nga giingong sakop sa Alpha Kappa Rho fraternity human kini pusila sa wala mailhing lalaking angkas sa laing motorsiklo niadtong Miyerkules sa gabii diha sa eskina dalan Rabaya ug South Coastal Road, barangay San Roque, dakbayan sa Talisay.

Ang biktima giila sa mga polis pinaagi sa identification card niini nga si Juanito Dias Barnes Jr. taga barangay Poblacion, lungsod sa Minglanilla kinsa nakaangkon og samad pinusilan sa agtang ug ang bala milahos ngadto sa walang dunggan niini.

Si Barnes daling gidala ngadto sa Talisay City District Hospital apan paglabay sa pipila ka minutos nakabsan kini sa kinabuhi.

Sila si SPO4 Daniel Tarucan, PO3 Benedicto Lasque ug PO3 Ferdinand Pablo ang daling miresponde sa maong hitabo. Si Lasque nga nahinabi sa Banat News kagahapon nagkanayon nga gipangtawgan nila ang mga numero sa cellphone nga na-recover gikan sa biktima apan pulos kini gipang-off.

Matud ni Lasque nga ang biktima nag-angkas og motorsiklo gikan sa barangay Tanke ug nagkinataw-anay pa sa drayber dihang duha ka wala mailhing lalaking sakay usab og motorsiklo nga nagsunod kanila ang kalit nga mipusil sa biktima.

Human sa pagpusil, gikatahong mihunong ang mga mamumuno sa unahang bahin paatubang ngadto sa dakbayan sa Sugbo nga daw nagpaabot sa motorsiklong gisakyan sa biktima.

Si Lasque mibutyag nga ang drayber sa gisakyang motorsiklo ni Barnes gikatahong ang miuyog-uyog sa iyang motor samtang nagdagan hangtud nga nahagbong ang biktima.

Dugang pa ni Lasque human niini gikatahong misunod ang gisakyang motor sa biktima sa nagpaabot nga mga kriminal ug nagdungan og bulhot padulong sa dakbayan sa Sugbo.

Nagduda karon si Lasque nga daan nang giplano ang pagpatay sa biktima ug atraso o personal nga kaaway ang usa sa mga anggulo nga ilang gisubay sa maong krimen. Nakuha usab ang usa ka kabhang sa kalibre .45 nga bala. (BANATNEWS)