P300 mil nga nubain ug 'pusher' nasakmit

CEBU, Philippines - Usa ka libo ka ampules sa nubain ang nasakmit sa Regional Intelligence Division sa Police Regional Office-7 atol sa buybust operation sa miaging hapon nga miresulta sa pagkasikop sa usa ka gipasanginlang tig-suplay niini.

Ang buy bust natigayon sulod mismo sa balay sa suspetsadong si Giovanny Agujar, 26, nagpuyo diha sa Phase 2 Blk 5 Lot 11 sa Deca Homes Subdivision sa barangay Tungkil lungsod sa Minglanilla.

Ang usa ka libo ka nubain ampules dunay nagkalain-lain nga brand o generic names, gilangkuban sa 40 ka boxes sa Nalbin (Nalbuphine HCI), 60 ka boxes sa Ashtec-10 (Nalbuphine HCI) nga maoy nakuha atol sa buy bust operation nga mikabat og P300 mil ang kantidad sa street value niini.

Si Chief Insp. George Ylanan sa RID-7 nga maoy nangulo sa maong operasyon mibutyag sa mga tigbalita nga human nila nasikop si Leonarda Lim diha sa barangay Kamagayan nga usa ka supplier og nubain pipila na ka buwan ang nakalabay, ilahang gisundan si kinsa ang misawo og pagpamaligya niini og nubain tungod kay namatikdan nilang nagpadayon gihapon ang market niini.

Diha na mitumaw ang pangalan ni Agujar nga giingong maoy mipuli ni Lim. Dali dayon silang mi-order og 40 ka boxes nga nubain ampules niadtong miaging hapon diha sa sulod mismo sa balay sa suspek.

Gamit ang marked money nga gipatong sa budol money nasikop ang suspek . Nasuta nga si Agujar giingong gikan sa Tondo, Manila ug ipadala sa iyang sources pinaagi sa parcel (air freights).

Nagtuo si Ylanan nga luag kaayo ang seguridad niini sa mga parcels karun kay malutsan man lang gihapon.

Gidugang niini nga si Agujar kusog kaayo ang market niini diha sa Kamagayan sa dakbayan sa Sugbu kay matag duha ka adlaw mohurot naman kini og usa ka libo ka ampules.

Matud pa sa kapolisan ang barangay Kamagayan karon maoy sentro nga bagsakanan sa maong matang sa ginadiling drugas ug diha usab mangompra ang mga pushers gikan sa barangay Pulangbato, Dita, ug Talamban.

Gipasidan-an sa kapulisan nga delikado ang paggamit og syringe (injections) nga maoy gamiton sa paggamit sa nubain nagbutang sa mga adik sa peligro sa ilang kinabuhi ilabi na ang pagbanos-banos sa dagom.

Ang mga sakit nga Hepatitis ug HIV-Acquired Immune Defficiency Syndrome (AIDS) ug uban pang sakit makuha dili lang sa pakighilawas kondili lakip na sa pagbanos-banos sa dagom sa injection.

Si Agujar dihang gikuhaan og habig sa mga sakop sa media nagdumili sa paghatag og pamahayag.

Si Agujar kasamtangan karung gibalhog sa detention cell sa Fuente Police Station ug matud pang Ylanan ilahang ipasaka ang kaso kagahapon sa hapon diha sa piskaliya nga kalapasan sa section 5 ug 11 sa article II of Republic Act 9165 batok sa suspetsado. (BANATNEWS)