CEBU, Philippines - Tungod sa tumang kaguol nga makigbuwag na kaniya ang nagsabak nga kapuyo usa ka 26-anyos nga lalaki ang gikatahong mium-om sa sumbohan sa armas ug nagpusil sa iyang kaugalingon diha sa barangay Punod sa lungsod sa Pinamungajan niadtong Miyerkules sa alas 9:00 sa gabii.
Ang nagpakamatay mao si Elizer Suchisa, 26, minyo apan nakigpuyo na sa laing babaye nga si Jackelyn Sato, 27, mabdos og lima ka buwan.
Matud ni PO1 Froilan Velasquez sa Pinamungajan Police dihang nahinabi sa Banat News subay sa ilang imbestigasyon si Suchisa ug Sato nag-estorya nianang gabhiona diin gikatahong gimandoan kini sa babaye nga papaulion nalang kini sa dakbayan sa Sugbo aron balikan ang mabdos pud niining asawa.
Sumala pa nga human niini misinta si Suchisa ug nasuko dayong kuha sa usa ka kalibre .38 ug mibahad nga mas maayo pang patyon niya si Sato ug dayon maghikog usab siya kung magkabuwag silang duha.
Samtang sila namahulay na nianang pagkataudtaod giingong kalit mibarog si Suchisa sa ilang higdaanan dayon gium-om niini ang armas ug gikablit.
Pagtan-aw ni Sato natumba na si Suchisa nga nalungag ang luyong bahin sa ulo. Ang mirespondeng mga polis midala kaniya sa tambalanan apan patay na kini.
Nakuha sa kapulisan ang armas nga dunay tulo ka buhing bala ug usa ka kabhang sud sa tambor niini. (BANATNEWS)