Byron naglagot sa Filinvest

CEBU, Philippines -  Si kanhi Capitol consultant Byron Garcia miangkon nga siya’y nagpatang-tang sa dish antenna sa Cignal cable TV nga gipataud sa Filinvest sa club house sa Corona Del Mar subdivision niadtong Domingo.

Kini tungod kay ang club house gipanag-iya sa mga homeowners   o mga nanagpuyo sa maong subdivision ug isip siya maoy presidente angayang mananghid sila kaniya, matud ni Garcia. Ang maong pamahayag gihimo ni Garcia gumikan sa reklamo sa mga opisyal sa Filinvest kinsa maoy mihangyo sa Cignal cable nga magpataod sila og antenna kay motan-aw sila sa duwa ni Pacquiao ug Marquez niadtong Domingo

Apan tungod kay mideretso lang og instalar ang taga Cignal nga wala mananghid   kang Garcia mihiwasa kini sa kasuko ug gipatangtang ang maong antenna. Si Byron nga igsuon ni Gobernador Gwendolyn Garcia nagkanayon nga iyang gitambagan ang taga Cignal nga dili mag-apil-apil sa bangi tali sa Filinvest ug mga nanagpuyo sa Corona del Mar subdivision ug karon gipaabot niya ang mga trabahante sa Cignal aron kuhaon ang maong antenna nga gihiposan niya   sa ilang balay.

Sa laing bahin, si Garcia nagkanayon nga ang bangi tali sa mga nagpuyo sa Corona del Mar ug Filinvest nga developer   nga maoy developer sa maong subdivision mitumaw dihang ang naulahi wala motuman sa gisaad niini ngadto sa mga molupyo.

Si Garcia nagkanayon ang nakapalagot kanilang mga homeowners mao ang kapakyas nila sa pagbaton og titulo sa ilang yuta bisan dugay na kaayo nila kining nabayran. Gawas niini wala usab matuman ang boardwalk ug MARINA nga gisaad sa Filinvest nga tukoron daplin sa baybayon sa maong subdivision.

Gawas niini , ang Filinvest namalit og tubig gikan sa Metropolitan Cebu Water District (MCWD) sa tag P13 ang matag metro kubiko apan giingong gibaligya sa maong developer   ngadto sa mga homeowners og sobra sa P60 ang matag metro kubiko niini. Ang mga molupyo miduso og kaso ngadto sa Housing and Land Use Regulatory Board (HLURB) bahin sa mga reklamo nila batok sa Filinvest.

Gikataho nga si Garcia nagkanayon nga laing gikalagotan niya sa taga Filinvest mao ang kawalay tahod niini kaniya isip presidente sa mga nanagpuyo sa Corona del Mar.

Si Garcia nagkanayon nga gibana-bana niyang mokapin sa 300 ka pamilya ang nagpuyo karon sa Corona Del Mar ug 10 porsyento lang niini ang misuporta sa Filinvest.

Sa laing bahin, usa sa mga nagpuyo sa maong subdivision nga si Mike Williams, 49,   nagkanayon nga napalit niyang “cash” ang iyang lote nga gipuy-an karon sa milabay’ng upat ka tuig apan hangtud karon wala gihapon sila hatagi sa titulo niini apan   wala mohatag ang Filinvest nila og rason kalabot niini. Gibutyag usab ni Williams nga nakadungog sila og mga huhongihong nga dili pa iya sa Filinvest ang tanang lote sa Corona Del Mar hinungdan nga nagpahigayon sila og imbestigasyon niini.

Si Williams mibahad nga kung mapamatud-an nila ang maong report posibleng mopasaka sila og kaso batok sa Filinvest.

Gibutyag usab ni Williams nga ang Filinvest walay klarong maintenance kay magpunay lang og saad-saad ang tagdumala niini nga ayuhon ang mga nangagubang pasilidad sulod sa subdivision apan wala gayud tumana. Ang mga tigbalita misuway og kuha og contact number ni Antonio Lopez, ang administrator sa Filinvest aron makuhaan sila sa ilang habig apan ang mga gwardiya sa guardhouse sa Corona del Mar nagdumili sa paghatag sa maong contact number. Ang gwardiya nga si “Cabasag” nagkanayon nga bag-o pa silang nadestino diha sa lugar ug gani adunay order kanila ang tagdumala sa Filinvest nga dili pasudlon ang mga sakop sa media sulod sa maong subdivision. (/WC)(BANAT NEWS)