CEBU, Philippines - Giklaro sa buhatan ni Governor Gwendolyn Garcia nga nagpabiling maayo ang relasyon tali sa gobernador ug ni magpapatigayon Glenn Soco kinsa maoy tag-iya ug tagdumala sa Mandaue Integrated Manpower Services ( MIMS), ang janitorial service agency nga gi-hire sa Kapitolyo.
Kini bisan pa man og ang kagamhanan sa lalawigan sa Sugbo pormal na nga ni-terminate sa janitorial services nga kontrata sa MIMS sa Kapitolyo.
Matud pa ni Capitol Consultant on Information, Revenue Generation and Compliance, Rory Jon Sepulveda nga wala makaapektar sa maong isyu ang maayong pagtinagdanay sa gobernadora ug ni Soco ilabi na nga mga miyembro sila sa gihapon One Cebu party.
Gani nagpabiling nag-una nga organizer si Soco uban sa mga miyembro sa Mandaue Chamber of Commerce and Industry sa Obra Negosyo Eskuyla, usa sa mga programa nga padayon nga gipatuman ni Gobernador Garcia nga nagtabang sa mga gagmay’ng negosyante sa kalungsoran.
Gipasabot ni Sepulveda nga ang gibasehan sa buhatan sa gobernador sa pagputol sa kontrata sa MIMS mao ang kadaghan sa mireklamo batok sa performance sa mga janitor sa MIMS base sa gipahigayong evaluation sa Provincial Legal Office. (BANAT NEWS)