CEBU, Philippines - Mokabat sa P1 milyon ang kantidad sa mga butang ug kwarta walay labot sa $6,000 (Lebanese) ang nawala o gidala sa mga wala hiilhing kawatan gikan sa tulo ka mga biktima sa managlahing lugar sa dakbayan sa Talisay sa miaging Lunes ug kagahapon sa kaadlawon.
Ang mga biktima mao si Janice Canono Alhabbas, 26, asawa sa usa ka langyaw, Wevina Silva,nga nagpuyo sa Camella Homes sa barangay Lawaan, ug si Kjell Edgar Nerland, 21, nagpuyo sa Greenville subdivision, pulos sa dakyaban sa Talisay.
Si Alhabbas misumbong sa kapolisan nga samtang nagpatupi ang iyang bana, sa usa ka barber shop sa barangay Tabunok niadtong Lunes sa gabii ang shoulder bag niini nga kolor black-orange nawagtang sulod sa nahisgutang barber shop.
Sulod sa maong shoulder mao ang P300 mil nga kwarta, $6,000 (Lebanese), usa ka Samsung cellphone, P6,000, usa ka Cherry mobile nga cellphone, P12,000, Seiko divers watch, P13,000, duha ka passport, storage camera, P2,000, napulo nga mga valid ID, credit card, duha ka jacket, ug uban pang mga importanteng dokumento.
Samtang si Silva, mitumbok sa ginganlan og Berto nga taga barangay Maghaway nga maoy mikawat sa iyang Lenovo laptop nga nagkantidad og P70,000, nagkalain-laing alahas nga nagkantidad tanan og P100,000,Samsung nga external sa cellphone ug DVD writer nga nagkantidad og P15,000 ug uban pang mga butang.
Sa pakisusi sa kapolisan ang kawatan misaka sa koral sa balay sa biktima ug miguba sa lock sa pultahan hinungdan nga nakasulod kini diha sa balay niadtong Lunes sa gabii.
Kagahapon sa buntag, usa ka Norwegian national nga si Kjell Edgar Nerland, 21, nagpuyo sa Greenville, subdivision, barangay San Isidro gikawatan usab og Asus laptop nga nagkantidad og P300,000 ug usa ka Samsung nga cellphone nga nagkantidad og P5,000.
Matud ni Nerland nga nahinanok siya sa pagkatulog dihang ang wala hiilhing kawatan misulod sa iyang balay nga wala ma-lock ang main door. Padayon pang gipangita sa kapolisan ang mga kawatan. (BANAT NEWS)