Bella Ruby positibong gitumbok sa 12-anyos

CEBU, Philippines - Positibong gitudlo sa 12-anyos nga batang testigo si Bella Ruby Santos nga maoy usa sa mga midagit sa 6-anyos nga si Ellah Joy Pique atol sa presentasyon niini kagahapon diha sa korte.

Kagahapon sa buntag ang unang presentasyon sa mga ebidensiya sa prosekusyon alang sa “petition for bail” nga giduso sa kampo ni Santos.   Si Prosecutor Petronio Elesterio mibutyag ngadto sa sakop sa media nga ang unang witness sa prosekusyon positibong miila kang Santos. Apan ang abogado sa depensa nga si Rameses Villagonzalo nagkanayon nga ang pagtumbok sa bata kang Santos paborable sa ilang kaso.

“You draw your own conclusion, if nakulatahan pa mi karon mongisi kaha mi?” ni Villagonzalo pa. Si Private Prosecutor Juan Saniel sa Children’s Legal Bureau maoy mipahigayon og direct examination sa 12-anyos diha sa sala ni Judge Ester Veloso sa Regional Trial Court Branch 6.

Ang maong direct examination gipahigayon diha sulod sa chamber wala sa open court tungod kay menor de edad man kini sa tuyo nga dili ma-trauma ang bata ug gitugotan lang ang isi’g ka habig og tag-duha ka abogado diha sa chamber.

Ang amahan ni Ellah Joy nga si Renante Pique ug ang asawa niini wala sad tugoting makasulod ngadto sa chamber.

Atol sa maong hearing adunay gibanabanang 50 ka mga dumadapig ni Santos ang mitambong ug nagsuot og parehong sinina nga nag-ingon nga inosente si Santos ug ang uyab niining Briton nga si Ian Charles Griffiths.

Kahinumduman nga si Ellah Joy ang gidagit niadtong Pebrero 8, 2011 dihang paingon na kining mopauli gikan sa iyang tunghaan sa Calajoan Elementary School ug pagkasunod adlaw napalgan na lang ang iyang patay’ng lawas diha sa bung-aw nga bahin sa lungsod sa Barili. (BANAT NEWS)