P8 nga pletihan giduso

CEBU, Philippines - Giduso karun sa usa ka transport group sa Sugbo nga mausbawan ug himuon nang P8 ang minimum nga pleti sa mga pasaheroan aron pagtubag sa gihulagway nilang nagsunod nga usbaw sa presyo sa produktong petrolyo.

Ang City Transport Cooperative (CITRASCO) maoy nangusog karon nga ikapatuman ang dugang .50 sentabos nga umento sa pletihan aron matapakan ang alkanse sa mga drayber nga maoy naapiki karun ning sunod sunod nga usbaw sa presyo sa produktong petrolyo.

Matud ni Ryan Benjamen Yu, chairman sa maong grupo dihang nahinabi sa Banat News nga panahon na usab karun nga ilang hingusgan ang pagpangayo og umento sa plitihan. Nangangkon kining wala nay mahabilin sa tibuok adlaw nga pagpamasada sa mga drayber tungod sa kamahal nga presyo sa petrolyo ug abangan sa jeep ug ang nagsaka usab nga presyo sa spare parts.

Matud ni Yu wala na kinahanglana nga moduso pa sila og petisyon ngadto sa Land Transportation Franchising and Regulatory Board (LTFRB) tungod kay duna na silay giduso kaniadto nga himuong P8 ang minimum nga pletihan.

Apan ilaha una kining gihikling kaniadto tungod kay nagpabilin usab ang minimum nga suholan sa mga mamumuo nga maoy usa sa mga apektado.

Hinuon matud ni Yu iyaha pang konsultahon ang ilang abogado kun gikinahanglan pa ba sila nga moduso og bag-ong petisyon o ba kaha usa lang ka mosyon aron mag-awhag kang LTFRB-7 director Ahmed Cuizon nga mohimo na og aksyon sa pending nilang petisyon.

Sa labing uwahing usbaw nga gipatuman sa presyo sa produktong petrolyo sa mga kompaniya sa lana nahitabo sa milabay’ng adlaw nahimo na karun nga 46 ang litro sa presyo sa diesel dinhi sa Sugbo.

Niadtong milabay’ng Domingo ang Pilipinas Shell Petroleum Corp., Chevron Philippines Inc. ug Total Philippines Inc. mipausbaw og P1.90 sa presyo sa ilang diesel tungod sa giingong pagsaka sa presyo sa lana sa kalibutanong merkado. Gipaabot nga mosunod usab niini ang ubang oil players.

Ang pagpangayo sa bag-ong P8 nga minimum nga pletihan sa maong transport group nisunod human moduso og petisyon ang transport group sa kaulohan nga nangayo usab og dugang 2 pesos nga umento sa pletihan didto.(EIM)(BANAT NEWS)