CEBU, Philippines - Talandugon ang kahimtang sa usa ka parolado human gisulong ug gipusil diha sa iyang balay sa maguwang sa iyang gipatay pipila ka tuig na ang nilabay sa bukirang bahin sa sitio Malayahay sa barangay Tigib sa lungsod sa Argao niadtong Domingo sa alas 8:00 sa buntag.
Ang biktima mao si Meliton Oyangorin, 38, nagpuyo sa maong lugar ug niadto pang petsa 2 sa milabay’ng bulan sa Oktubre nakagawas gikan sa National Bilibid Prison sa Muntinlupa human mabilanggo tungod sa pagpatay sa manghod sa suspek nga si Jaime Baquiran niadtong 2001.
Ang suspek mao si Adolfo Baquiran, 64, maguwang sa napatay sa biktima gituohang buot nga makapanimalos sa gidangatan sa igsuon sa mga kamot sa suspek.
Matud ni PO2 Bernie Lao, desk officer sa Argao Police Station dihang nahinabi sa Banat News samtang nagluto og pamahaw ang biktima kalit misulod ang suspek ug sa way daghang estorya gipusil kini makadaghang higayon.
Ang biktima naigo sa iyang bukobuko ug natapsingan sa ulo ug nahagba. Ang suspek daling miikyas human sa hitabo.
Apan ang biktima daling natabang ug gihatud sa Isidro Kintanar Memorial Hospital sa lungsod ug gibalhin sa Vicente Sotto Memorial Medical Center.
Samtang atol sa hot pursuit operation nasikop ang suspek diha sa iyang pinuy-anan pagka alas 10:00 na sa buntag ug way armas nga na-recover sa iyang posisyon. - (BANAT NEWS)
Complete…