400 gas stations tukoron sa Chevron

CEBU, Philippines - Mopatukod og dugang 400 ka mga gasoline stations sa mosunod nga mga buwan ang Chevron Philippines Incorporated ang kompanyang nagbaligya sa produktong Caltex dinhi sa Asia-Pacific sumala pa sa ilang tigpamabang si Toby Nebrida.

Si Nebrida atol sa pagsaulog sa Caltex sa ika-75 anibersaryo sukad sa katukoran niini niadtong 1936 nagkanayon magpabiling moserbisyo sa publiko sa mosunod pang mga katuigan ug ang anibersaryo sinugdanan palang sa ilang pag-arangkada.

Matud pa ni Nebrida ang Pilipinas maoy sentro sa usa sa labing dako nilang merkado dinhi sa Asia-Pacific. Gibana-banang mokabat sa 120 ka mga bag-ong gasoline stations gikan sa 400 ka mga gas stations nga giplanong tukoron sa Asia-Pacific ang ibutang dinhi sa nasud.

Sa pagkakaron ang Caltex (Chevron) adunay 33 ka mga gasoline stations dinhi sa Sugbu ug niadtong milabay’ng Biyernes gibuksan ang tulo ka bag-ong gasoline stations sa Lapulapu City ug sa North Reclamation Area.

Matud pa ni Nebrida nga ang Sugbu maoy usa sa labing paspas ang pagtubo sa ekonomiya maong nagtinguha ang Caltex nga mamahimong ka-partner niini sa paglambo pinaagi sa ilang mga produkto ug mas gipalambong serbisyo.

“The energy demand here in Cebu City is surging-and with our strong brand, dedicated people and partners, we are well-positioned for success,” matud pa ni Nebrida.

Ang Chevron aduna karoy moderno ug sistematikong paghatud sa ilang mga produkto gikan sa ilang mga terminals padulong sa mga konsumidor ug gipasalig sa Chevron nga de kalidad nga produkto sa Caltex ang mapalit sa tanang Chevron (Caltex) gasoline stations sa tibuok nasud.

Nagsugod ang maong kompanya sukad pa sa 1917 dihang ang Texas Company (Texaco) misulod sa merkado sa Pilipinas, pagka-1936 opisyal nang gipanganlan ang produkto niini nga Caltex dihang ang Texaco nakig- merge sa Standard Oil Company sa California hinungdan sa pagkatawo sa pangalan nga Cal-Tex (Caltex).

Ang Caltex maoy nagbaligya sa mga nailang mga oil lubricants, fuels, sama sa Caltex-Delo, Techron, Caltex Power Diesel ug uban pa.   - (BANAT NEWS)