Horandoy mi-'plead not guilty'

CEBU, Philippines - Ang akusado sa pagpatay ni Assistant City Prosecutor Patrick Osorio mi-“plead not guilty” atol sa arraignment kagahapon sa buhatan ni Regional Trial Court Branch 17 Judge Silvestre Maamo.

Si Lyndon Horandoy gipaluyohan sa iyang abogado nga si manlalaban Daryll Amante.

Atol sa arraignment si Amante mipadayag sa atubangan sa piskal nga adunay katungod ang akusado nga ipaubos sa preliminary investigation aron kahatagan kini og higayon sa pagpanubag sa akusasyon batok kaniya.

Mituki usab si Amante ug basihanan sa iyang pagsang-at ug quashal of the information.

Midugang usab si Amante nga adunay laing prosecutor nga gimandoan ni Gubalane nga mohusay sa maong kaso uban sa laing akusado nga si Allan Sinogat.

Apan si Maamo mimando ni Amante nga moduso og pormal nga pleading kalabot sa iyang gipangayo.

Nasayran nga mao kini ang ika-lima nga arraignment sa akusado dihang ang una hangtod sa ika-tulong araignment wala mahinayon tungod kay ang akusado walay abogado sa maong higayon.

Samtang sa ika-upat nga arraignment nauktaba usab   tungod kay ang abogado niini nga si Amante adunay kakuli-an hinungdan nga wala makatambong.

Kahinumdoman nga si Horandoy nasikop niadtong buwan sa Agosto ning tuiga didto sa barangay Guba ning dakbayan sa Sugbo pinaagi sa warrant of arrest nga giluwat usab ni Maamo diin siya ang giingong suspetsado sa pagpatay ni Osorio tulo na ka tuig ang milabay.   (Lesley Caminade-Vestil/WC)   - (BANAT NEWS)