Gitigbas pagkahuman gipusil patay

CEBU, Philippines - Gitigbas ug gipusil patay sa pag-umangkon ang kaugalingon niining uyoan sa ilang panag-away diha sa sitio Palaypay barangay Tulosa sa lungsod sa Malabuyoc niadtong Domingo sa alas 11:00 ang takna sa gabii. Ang biktima nga patay dihadiha mao si Pedro Balansag, 62, molupyo sa maong lugar ug usa ka mag-uuma samtang giila ang pag-umangkong suspek nga mao si Hilario Balansag, 23, nagpuyo gihapon sa maong apit.

Matud ni SPO4 Ariel Mascardo, imbestigador sa Malabuyoc Police Station subay sa imbestigasyon ang biktima ug suspek nagkuyog nga nanan-aw og basketball.

Apan sa ilang pagpamauli sumala pang Mascardo base sa pamahayag sa suspek kalit nasuko kaniya ang biktima nga walay igong hinungdan maong naglalis sila niini ug nakurat nalang nga gigukod siya niini og sundang. Matud pa sa suspek sa mga polis mikaratel siya og dagan apan nadagma ug naabtan sa suspek hinungdan nga nakig-ilogay nalang siya sa maong hinagiban ug dihang iyaha kining nakuha natigbasan niya ang biktima sa kalawasan.

Sumala pang Mascardo wala pa gyud matagbaw mibunot ang suspek sa wala matinong kalibre sa armas dayon gipusil ang biktima sa walang mata ug milapos ang bala sa walang bahin sa dunggan niini ug gihulagway nga namatay kini diha dayon.

Samtang ang suspek nadakpan usab dayon sa kapulisan ug nagtingkagol na karun sa karsel ug gihikay na ang kasong ipasaka batok niya.   - (BANAT NEWS)