Diplomat gisikop sa tanod

CEBU, Philippines - Usa ka giingong diplomat gisikop sa mga tanod dihang nanghasi kini sa ilang balay sa Carmen Village, barangay Poblacion, dakbayan sa Talisay kagahapon sa kaadlawon.

Si Mohammad Abdula Almagbi, 50, temporaryong nagpuyo sa usa sa mga beach resort sa barangay Poblacion giingong hubog ug nanghasi sa maong lugar.

Dali kining gidala sa mga tanod ngadto sa Talisay City Police Station apan giingong milanit kini sa giluklok niyang mga papeles ug mga dokumento nga nagpamatuod nga   usa siya ka diplomat hinungdan nga gibuhian dayon kini sa mga polis.

Kini tungod kay ang usa ka diplomat may katungod kini nga gawasnon sa unsa mang salaod nga ilang mabuhat sa usa ka lugar gawas lang sa mga kaso nga may labot sa pintas nga krimin.

Ang nagpaalarma sa maong hitabo mao si Mae Auza, 43, residente sa Carmen Village ug giingong uyab ni Almagbi.

Ang mga tanod nga mitubag sa alarma mao sila si Jingzon Zabal, Roel Tabelon, Lucilo Deiparine ug Noel Villoria.

Si Almagbi gipasanginlan ni Tabelon nga nanagpa kaniya dihang iya kining gibadlong kay nanghasi.

Giingon nga pag-abot niini sa police station giusban pa usab siya   og sagpa sa maong langyaw.

Apan si Almagbi mipa-blotter usab ug mibali og pasangil kang Tabelon nga gisagpa siya sa maong tanod samtang nagpaingon sila diha sa police station. (WC)(BANAT NEWS)