Danyos sa sunog sa Alang-Alang P400 mil

CEBU, Philippines - Mokabat sa P400,000 ang gibanabanang danyos sa sunog sa tanang balay nga naugdaw didto sa sitio Pulang Bukid sa barangay Alang-Alang, dakbayan sa Mandaue sa miaging hapon.

Kini ang gibutyag ni FO2 Edgar Campo-amor sa kabomberohan sa dakbayan sa Mandaue   sa pakighinabi sa Banat News kaniya.

Matud ni Campo-amor nga sa ilang labing ulahing pag-ihap sa mga balay nga naugdaw sa maong sunog nakatala sila og 70 ka balay ang hingpit nga naugdaw.

Dugang pa niya nga dali ra kaayong nahimong abo ang maong mga balay tungod kay kasagaran niini ginama sa mga gaan nga mga dapat.

Gitataw niya nga kasagaran sa mga balay nga nasunog adunay nanag-abang nga mga pamilya hinungdan nga mikabat sa 200 ka pamilya ang apektado sa maong sunog.

Dugang pa ni FO2 Campo-amor nga nasuta usab nila nga depektusong linya sa kuryente maoy hinungdan sa kalit nga pag-ulbo sa kayo   gikan sa kisame sa balay ni Pacita Mansueto.

Si Mayor Jonas Cortes miingon nga ang mga biktima kansang balay nga nasunog nahimutang sa danger zone area dili na tugotang makatukod pa pag-usab   sa maong lugar.

Dugang pa niya nga iyang awhagon ang maong mga biktima nga adto na mopatukod sa bag-o nilang balay sa 6.5 ka ektarya nga luna nga gipalit sa kagamhanan ubos sa Community Mortgage Program (CMP) sa barangay Pacnaan, sa maong dakbayan. (BANAT NEWS)