Mipatay sa tawong gisud og sako ilhan na

CEBU, Philippines - Nailhan na sa kapolisan ang suspetsado nga mitigbas patay sa usa ka lalaking gisulod og sako sa sitio Saac II, barangay Buaya sa dakbayan sa Lapulapu nga napalgan sa miaging buntag.

Kini ang nasayran sa Banat News kang PO2 Franklin Bolaquia sa homicide section sa kapolisan sa maong dakbayan kinsa mipugong una sa ngalan sa maong suspek.

Matud pa niya   nga ilang nasuta nga usa ka notadong kawatan ang gipatay nga si Ramene Cabarga Macasero.

Gani matud pa niya nga makadaghan na nila kadto gukura apan wala gyud nila hidakpi gumikan sa kakusog modagan sa maong tawo.

Si PO2 Bolaquia miingon nga adunay duha pa ka kauban si Macasero nga inila usab nga mga kawatan sa maong dapit kinsa pulos gawasnon sa pagkakaron.

Dugang pa niya nga dili pa nila ikabutyag ang ngalan sa suspetsado sanglit walay testigos nga mobarog sa pagtumbok niini.

Nasuta karon sa kapolisan nga walay labot ang isyu bahin pagpayuhot sa illegal nga drugas kay natino na nila nga ang pagkakawatan sa biktima maoy usa sa hinungdan sa iyang kamatayon.

Si SPO2 Ernesto Francisco sa kapolisan sa Presinto 2 sa Mactan Police Station mibutyag sa Banat News  nga ang gipatay maoy usa sa suspetsado sa pangawat nga nahitabo sa usa ka establisamento sa maong dapit dili pa dugay.

Giila ni SPO2 Francisco ang nadakpan kinsa kauban  usab sa namatay ug nagtingkagol na karon sa ilang detention cell mao si Carillo alyas Jolyn nga nagpuyo usab sa nahisgotang dapit.

Dugang pa ni SPO2 Francisco nga pipila sa mga nabiktima sa pagpangawat sa maong mga notadong kawatan mao ang pipila ka buhatan og yati sa barangay Mactan sa maong dakbayan. (BANATNEWS)