CEBU, Philippines - Gilubong na kagahapon sa buntag sa Doña Pepang Osmeña mausoleum ang 98 anyos nga si Lourdes de la Rama-Osmeña.
Si Lourdes maoy inahan nila ni Kongresista Tomas Osmeña ug Senador Serge Osmeña III kinsa namatay niadtong Nobiyembre 6, 2011 sa alas 8:45 sa buntag didto sa Dr. Pablo O. Torre Memorial Hospital sa Bacolod City.
Sa wala pa ang lubong, gihimo una ang misa requiem sa simbahan sa Sacred Heart.
Si Lourdes natawo niadtong March 9, 1914 ug nakabaton kini’g lima ka anak nga sila si Tomas, Serge III, Maria Victoria “Minnie, Esteban ug Georgia.
Nailhan na ang mga kabanay nga Osmeña sa tibuok Pilipinas gumikan kay nagtubo sila sa kalibotan sa politika. Ang mga anak ni Lourdes mihulagway sa ilang inahan nga grabe ka disiplinado nga pagkatawo ug kanunay kini mopasidaan sa ilang mga anak nga mokaon og sustansiyadong pagkaon.
Mitambong usab sa funeral service ang pipila ka mga personalidad sama nila ni Bise Presidente Jejomar Binay ug ang kanhi kongresista sa Makati City nga si Teodoro Locsin.
Kahinumdoman nga miduaw usab sa haya ni Lourdes niadtong Huwebes si Presidente Benigno Aquino III sa dihang didto pa kini gipahimutang sa Bacolod City, usa ka adlaw sa wala pa kini dad-a dinhi sa Sugbo.
Nakig-uban kang Aquino niadtong adlawa ang kalihim sa Department of Transportation and Communications nga si Mar Roxas, kalihim sa Department of Energy nga si Rene Almendras, ang Chief Executive Officer sa Philippine Amusement and Gaming Corporation nga si Cristino Naguiat Jr., ug uban pa. (BANATNEWS)