Showdown Pacquiao-Marquez

CEBU, Philippines - Mahatagan na gyud og katin-awan ang mga pagduda nga naghamok sa huna-huna sa boxing fans kun si kinsa gayod ang labing kusgan nga boksidor sa dihang ang mortal nga magkaribal nga sila si WBO welterweight champion Manny 'Pacman' Pacquiao ug Mexican legend Juan Manuel 'Dinamita' Marquez magbinukbukay karong adlawa (oras dinhi sa Pilipinas) didto sa MGM Grand Garden Arena sa Las Vegas, Nevada.

Dul-an na sa 10 ka tuig nga gitutokan sa mga boxing fans ang panagribal nila ni Pacquiao ug Marquez nga pulos karon naglaraw nga mohimo'g kumbinsido nga kadaugan aron matubag ang mga pangutana sa kinabag-ang boxing fans kun kinsa gyud nila ang labing kusgan ug lig-on nga boksidor.

Kagahapon, unang natubag ang pangutana sa gintang sa gidak-on sa duha dihang si Pacquiao (53-3-2, 38KOs) mitimbang og 143 lbs. nga labaw la'g usa ka libra sa timbang ni Marquez (53-5-1, 39KOs) nga 142 lbs.

Tungod niini, nakita sa mga boxing analysts nga dili mahimong factor sa away karon ang gidak-on, apan nakapangutana sila kun unsa ang epekto niini ngadto ni Marquez nga ikaduha pa lang ka higayon mosaka sa welterweight division.

Hinuon, si Marquez misaad nga walay mausab sa iyang lihok ug susama gihapon ang iyang ipakitang kaagresibo niadtong nakigsangka siya ni Pacquiao sa tuig 2004 ug 2008.

"We’re going to have speed in this fight," matud pa ni Marquez sa Associated Press. "I am going to combine it with intelligence with speed."

Sa iyang bahin, si Freddie Roach gibati og grabeng kahinam samtang nagtan-aw sa weigh-in tungod kay sa katapusan miabot na gyud ang takna aron pahilumon nila si Marquez.

Mas naglungot-lungot pa si Roach kay sa iyang batos nga si Pacquiao ngadto kang Marquez tungod sa pangangkon sa Mexican boxer nga siya gyud ang midaog sa unang-duha nila ka sangka.

"Manny wants to make a statement. He wants to get rid of this guy, put him behind once and for all," matud pa ni Roach. "When Manny puts him down this time I don’t think he’s going to be able to get up."

Si Pacquiao nagmakuli paghatag sa iyang pangagpas sa mahitabo sa ilang away, hinuon iyang buhaton ang tanan kutob sa iyang mahimo aron modaog.

Imbes mobahad, giangkon hinuon ni Pacquiao nga giapil niya sa iyang pag-ampo si Marquez nga walay dautang mahitabo niini atol ilang sangka karon.

"Ang pray ko, hindi lang sarili ko, pati na ‘yung kalaban ko ipine-pray ko na matapos ko ‘yung fight namin na napasaya namin ‘yung mga tao at walang lubhang masaktan," panapos ni Pacquiao. (BANATNEWS)