Bayot nagdunggab sa tiyan

CEBU, Philippines - Usa ka mahuyang kinsa nagumon sa ginadiling drugas nagdunggab sa iyang kaugalingon human hisamdi ang polis nga milayog kaniya sa balay sa iyang apohan   sa dalan A. Lopez, sitio Cogon, barangay Labangon, dakbayan sa Sugbo, kagahapon sa hapon.

Ang hinungdan sa pagsuway og hikog sa maong bayot nga ginganlan lang sa mga polis og Bulantoy mao ang iyang kasuko nga wala siya hatagi og kuwarta sa iyang apohan.

Apan una niya lubaa ang iyang tiyan, nasamdan na   si PO2 Rodel Dimaangay sa Motorcycle Riding Unit (MRU) sa tiyan     dihang misuway kini og ilog sa kutsilyo nga gikuptan sa maong bayot.

Si Chief Inspector Aileen Recla, hepe sa Punta Police Station kinsa maoy nangulo sa pagpakalma sa maong mahuyang nagkanayon nga wala nila makuha ang tinuod nga ngalan ug apilyedo ni Bulantoy tungod kay dali nila kining gidala ngadto sa tambalanan tungod sa samad sa iyang tiyan.

Matud ni Recla nga si Bulantoy giingong nanghasi sa ilang balay mga alas 12:30 kagahapon sa hapon ug misunog kini sa iyang kama tungod kay nasuko nga wala hatagi og kwarta sa iyang apohan.

Sa mga alas 12:50 ang apohan ni Bulantoy mitawag sa police hotline “166” ug nangayo og panabang.

Ang Special Weapon and Tactics (SWAT) ug MRU ang daling miresponde sa maong hitabo.

Apan dihang nakabantay si Bulantoy sa pag-abot sa mga polis midagan kini nga nagbitbit og kutsilyo pahilayo sa ilang balay ug nanggukod sa usa ka lalaki nga iyang natagboan sa karsada.

Si Recla nagkanayon nga naatol niadtong higayona nga paingon siyang mopauli sa ilang balay sa Bliss sa Labangon aron maniudto dihang nasugatan niya si Bulantoy nga migukod sa tawo kay iyang dunggabon busa    iya kining gibadlong.

Si Bulantoy mibalik sa ilang balay busa gisundan siya sa MRU aron pakalmahon siya. Apan matud pa ni Recla nga miabot nalang sa ala 1:00 sa hapon wala gyud buhii ni Bulantoy ang iyang kutsilyo .

 Samtang padayong gihansakhansak niini ang kutsilyo sa iyang tiyan ang uban nag-ampo nga idayon nalang unta kini og pataop, apan tungod kay gialam-alaman siya ni Recla wa gyud niya ipataop ang kutsilyo sa iyang lawas.

Unya pagkataud-taod nangayo kini og sigarilyo kang Recla busa gihatagan usab sa polis ug samtang nalingaw kini og pabuhot sa sigarilyo, gilayog siya ni Dimaangay aron ilogon ang kutsilyo apan gilupig sa kusog ang polis sa maong bayot busa nadunggaban ang maong polis sa tiyan .

Matud ni Recla nga nahuman ang ilang negosasyon mga alas 4:45 na sa hapon unya dihang miingon kini nga “gikapoy” na siya, kalit lang gihansak og dayon ang kutsilyo sa iyang tiyan.

Ang mga polis mihamag dayon kaniya ug nailog ang kutsilyo ni Bulantoy dayon gidala kini ngadto sa Chong Hua hospital apan gibalhin sa Cebu City Medical Center (CCMC).

Si Recla midugang nga ang iyaan ni Bulantoy mibutyag kanila nga ang iyang pag-umangkon nagumon sa ginadiling drugas hinungdan nga dili kini hatagan og kwarta sa apohan. Sa milabay’ng duha ka semana lang si Bulantoy nakagawas gikan sa rehabilitation center.(/WC)  (BANATNEWS)