100 ka kilo nga pinabuthang isda sakmit

CEBU, Philippines -  Mikabat sa 100 ka kilo nga mga pinabuthang isda ang nasakmit sa mga sakop sa Cebu City Bantay Dagat Commission (CCBDC) ug Bureau of Fisheries and Aquatic Resources (BFAR) sa kinalit nga inspeksyon niini nga gipahigayon didto sa Pasil Fishport sa miaging kaadlawon.

Usa sa lima ka dagkong truck nga ilang giinspeksyon   nasuta nga kargado sa pinabuthang isda nga giingong gikan sa barangay Kawit, lungsod sa Medillen.

Ang maong mga isda naglangkob sa danggit, molmol, talaba, lapu-lapu, alibangbang ug uban pa kansang kantidad mikabat sa P14, 200.

Nagkanayon ang executive director sa Bantay Dagat nga si Ret. Col. Ranulfo Sebusa nga ang trak nga ilang nadakpan nagtangag sa plate number nga GDR-154 nga gimaneho ni Belino Salinas apan walay tag-iya nga miangkon sa maong mga kargamento.

Nasuta nila ang maong mga pinabuthang isda dihang ilang gisusi ang mga kahon   nga didto sa ilawom sa maong sakyanan.

Gipaibabwan kini sa mga tarong nga isda o isda nga nakuha sa legal nga paagi.

Ang Bantay Dagat uban sa pakigtambayayong sa BFAR nagpadayon karon sa subsob nga operasyon batok sa illegal fishing.

“Hinaut lang ta sa mga mangisda nga magtinarong sa ilang pagpanakop og isda. Sayang kaayo ang ilang kahago kung ilang pabuthan ang isda kay ato raman gihapon na nga dakopon,” matud pa ni Sebusa.

Matud pa ni Sebusa nga ilang gidonar ang maong mga sinakmit nila sa nagkadaiyang pampublikong tambalanan ug foundation nga nagbase sa siyudad sa Sugbo.   - (BANAT NEWS)