CEBU, Philippines - Gitakdang ilusad karong Lunes, Nobiyembre 14, 2011 ang Cebu Provincial Anti-Drug Abuse Commission (CPAC) nga pormal nga giumol sa mga sakop sa hunta probinsiyal pinaagi sa pagpaningkamot ni Provincial Board Ivy Durano Meca, ang presidente sa Philippine Councilors League of the Philippines (LMP) Cebu Chapter ug kasamtangang chairperson sa Committee on Illegal Drugs sa hunta probinsiyal.
Matud pa ni Bokal Meca nga ang pormal nga paglusad sa CPAC gidugang sa pagsaulog sa Drug Awareness Week sa tibuok nasud sa Pilipinas.
Si Meca miingon nga ang iyang komitiba nakig-alayon usab sa buhatan ni Gobernador Gwendolyn Garcia alang sa kahingpitan sa maong kalihukan.
Gani gitug-an ni Meca nga human unya sa paglusad sa CPA, ang gobernador makigtagbo dayon sa mga sakop sa nahisgutan nga commission aron mahan-ay na ang mga programa ug ipatuman niining mga proyekto aron makasugod dayon kini sa kampanya batok sa illegal nga matang sa drugas.
Gusto sa gobernador nga mahimong illegal drug free ang lalawigan pinaagi sa paningkamot sa tanang organisasyon nga natukod batok sa mga sindikato sa gidiling drugas ug labaw sa tanan sa komisyon nga gitukod nga motan-aw pag-ayo sa mga kalamboan sa kampanya batok niining maong isyu. (WC) - (BANAT NEWS)