Kolektor sa lending naghikog

CEBU, Philippines - Usa ka collector sa lending firm kinsa naproblema gumikan sa giingong nakadispalko sa iyang koleksyon naghikog pinaagi sa duplex wire nga gihigot sa iyang liog sulod sa lawak nga iyang giabangan sa sitio Maharlika sa barangay Sambag II ning siyudad sa miaging hapon.

Si Wilbur Maribao, 25, ulitawo apan adunay kapuyo ug lumad nga taga Lopez Jaena, Misamiz Oriental, patay nang napalgan sa iyang kapuyong si Lunalie Lapastora nga usa sab ka empleyado sa lending firm.

Segun sa pasiunang imbestigasyon sa kapolisan, nasayran gikan kang    Lapastora nga nianang buntag nagteksanay pa sila sa iyang kapuyo apan kalit lang kining wala na mo-reply kaniya. Sa iyang kahibulong ug pagduda iyang giadto ang giabangan nilang lawak sa nahisgotang lugar pasado alas-4 sa hapon apan maoy iyang naabtan nga nagbitay na sa wire   nga gigaid sa double deck nga higdaanan. Sumala pa ni Lapastora nga nagluhod ang posisyon sa iyang kapuyo sa ubos nga bahin sa double deck. (BANAT NEWS)