Relic ni Saint Jean gidugok sa mga deboto

CEBU, Philippines -  Usa ka Santos nga Misa ug foot procession ang gipahigayon kagahapon diha sa Lutopan Parish Church sa Toledo agi’g pahinungod sa relic ni St. Jean (John) the Baptist de la Salle.

Ang relic nga mao ang bukog sa tuong kamot sa maong santos miabot niadtong Martes dinhi sa Sugbu diha sa tugpahanan sa Mactan-Benito Ebuen Air Base sa dakbayan sa Lapulapu ug gilibot ngadto sa mga dagkung syudad sa Sugbo.

Atol sa paglibot niini gisugat ug giatangan kini sa liboang mga deboto ug human mahatagi og religious rites ug military honors, ang relic gibiyahe balik ngadto sa Lutopan, Toledo.

Si Jean Baptist De La Salle usa ka santos nga Frances nga maoy mitukod sa Institute of the Brothers of the Christian Schools ug siya usab ang giilang patron saint sa mga Christian teachers.

Ang labing unang Christian Brothers School sa nasud sa Pilipinas nga nailhan karon isip De La Salle University sa kaulohan gitukod sa mga tagasunod ni St. Jean niadtong 1911.

Sa wala pa miabot ang maong relic dinhi sa Cebu, milibot na usab kini sa mga nagkalain-laing dapit sa nasud gikan sa Roma.

Human usab sa Santos nga Misa ug foot procession kagahapon didto sa Toledo, ang relic gidala ngadto sa De La Salle Andres Soriano Memorial School.

Didto sa ilang chapel ibutang ang relic sa santos ug ablihan kini sa mga deboto nga gustong mobisita hangtud sa Nobiyembre 18. Pagkahuman sa maong adlaw ibiyahe na usab kini paingon ngadto sa De La Salle John Bosco College sa Bislig, Surigao del Sur. (BANAT NEWS)