3 killers sa manag-uyab may kaso sa Bohol

CEBU, Philippines -  Nalambigit sa mga pagpanulis sa lalawigan sa Bohol ang tulo ka mga suspetsado sa pagpatay sa managhigugmaay nga sila si Jenelyn Primacio ug Junard Balorio sa barangay Buagsong sa lungsod sa Cordova.

Kini ang nasayran sa Banat News kang SPO1 Henry Amores nga miila sa mga suspek nga mao sila si Jeples Lufranco, Junjun Toremotsa ug Edwin Taghoy nga pulos lumad nga taga Buenavista sa lalawigan sa Bohol.

Ang tulo ka mga suspetsado ilang pasakaan og kaso ngadto sa korte ug gipalig-on kini pinaagi sa duha nila ka mga saksi nga nagtumbok sa tulo nga maoy nagpatay sa duha ka biktima.

Matud pa niya ang mga testigos mitumbok sa tulo nga maoy nagyayong sa mga biktima ug gidala sa nahisgutang dapit diin usab makaplagi ang ilang mga patay’ng lawas.

Sa ilang pagsusi sa background sa tulo didto sa kapolisan sa lungsod sa Buenavista sa Bohol ang mga polis didto gikatahong mibutyag nga pulos nag-atubang og mga kasong pagpanulis ug gipangita sila sa lungsod sa Buenavista.

Si Amores miingon nga nagpabilin pa gihapon ang katahap nila nga ang anggulo sa ilegal nga drugas ug love triangle ang hinungdan sa pagpatay sa duha.

Giangkon niya nga mitumaw ang pangalan sa usa ka tawo nga posibleng maoy ‘mastermind’ sa tulo aron patyon ang mga biktima.

Matud pa ni Amores nga sa ilang pakisusi nga gihimo ilang nasuta nga ang gipatay nga babaye maoy nahimong ikaduhang kapuyo sa usa ka tawo nga nalambigit sa pagpamaligya og shabu.

Ang banay ni Primacio dili makatuo ug misalikway sa pagduda sa kapolisan nga anggulo sa ilegal nga drugas ang motibo sa gidangatan niini, samtang ang banay usab ni Balorio namahayag sa mga balita nga napagan ra ang ilang igsuon. (EIM)(BANAT NEWS)