Ecleo ipabutang sa most wanted

CEBU, Philippines -  Irekomendar sa hepe sa Criminal Investigation and Detection Group (CIDG)-7 kadagkuan sa Philippine National Police (PNP) nga maapil sa most wanted sa Sugbu ug pabutangan og reward ang ulo sa kongresista sa Dinagat Island nga si Ruben Ecleo Jr., alang sa pagkasikop niini.

Si Ecleo nagtago-tago sulod na sa pipila ka buwan human malutsi og duha ka warrants of arrest gikan sa Sandiganbayan ug laing warrant of arrest sa sala ni Judge Soliver Peras tungod sa kasong Parricide labot sa pagkamatay sa asawa niining si Alona Bacolod-Ecleo.

Si Sr. Supt. Jose Pante, hepe sa CIDG-7 nga nahinabi sa mga tigbalita kagahapon nagkanayon nga iyang irekomendar sa provincial level ang reward money alang kang Ecleo aron madasig ang publiko pagtaho sa mga awtoridad kun asa magtago ang maong kongresista.

“Sama sa PNP mayroon silang most wanted person dahil sa recommendation, mayroong memorandum circular ang Napolcom (National Police Commission) na maisali siya sa most wanted person dito sa Cebu,” pasabot pang Pante.

Si Pante mipadayag nga andam sila mosikop kang Ecleo dihang gipangutana kini kung andam ba silang modakop kang Ecleo didto sa Dinagat Island .

Dihang unang gisikop si Ecleo didto kaniadto sa Dinagat Island sa mga sakop sa CIDG-7 pinangulohan kaniadto ni Sr. Supt. Edwin Diocos nakigpinusilay ang mga supporters ug sumusunod ni Ecleo isip supremo sa Philippine Benevolent Missionaries Association (PBMA) nga miresulta sa pagkakalas sa pipila ka kinabuhi. (BANAT NEWS)