CEBU, Philippines - Hingpit na ang desisyon ni Mayor Michael Rama nga iyang pailisan si City Treasurer Tessie Camarillo kay wala na siya makauyon sa performance niini base sa rekomendasyon sa mga pangulo sa nagkalainlaing departamento sa city hall.
Sa iyang pamahayag kagahapon gibutyag ni Mayor Rama nga gipaagi sa survey ang desisyon nga si Camarillo dili pa-depensahon sa gisugyot nga budget alang sa 2012.
Nagkanayon ang mayor nga sa wala pa ang gitakdang petsa sa budget hearing nakigtagbo siya sa mga pangulo sa nagkalainlaing departamento.
Dihang gisukit niya kun uyon ba sila nga si Camarillo maoy pa-depensahon sa 2012 budget, mayoridad sa maong mga hepe, wala mouyon ug ang ilang girekomendar nga moatubang sa mga konsehal atol sa maong hearing mao si City Treasurer Emma Villarete.
Gumikan niini, nagpadala dayon si Rama og suwat ngadto sa konseho nga si Villarete maoy iyang patambungon sa budget hearing.
Samtang giklaro ni Rama nga nanggungis na siya diha sa konseho apan karon lang siya makasugat og termino gikan sa kasamtangang mga maayong laki nga mga konsehal nga “budget hearing”.
Nagkatawa ang mayor kinsa usa ka abogado sa tinuod nga kinabuhi ug nagkanayon nga ”naluya ko og basa sa local government code (LGC), wala ma’y nakabutang didto nga budget hearing,” suma pa ni Rama.
Naglibog ang mayor kun nakabasa ba kaha og LGC ang iyang mga higalang konsehal kay “mauwaw baya ta sa mga magbubuhis kun magpatuyang ta og estorya nga way klaro,” matud pa sa mayor.
Gumikan niini iyang gitudloan ang mga tinamod nga mga konsehal sa siyudad nga ang tukmang termino “budget conference ug dili budget hearing”, sumala sa mayor nga mihimo og murag bugal-bugal nga pahiyom.
Ang mga tigpaniid nagkanayon nga nakatagpilaw tingale ang maong mga konsehal niadtong gileksyon sa ilang maestro ang maong isyu.
Apan giklaro ni Rama nga sa budget conference maoy tukion ang mga proyekto nga ialagad sa mga buotang opisyal ngadto sa katawhan.
Gani gisaway ni Rama ang unang budget conference sa miaging semana kay imbis mga proyekto sa syudad ang tukion giimbistigar naman hinuon sa iyang mga amigong konsehal ang mga tresurero kun asa og kuwarta alang sa maong budget.
Maoy hinungdan nga ang mga department heads nga wala makauyon sa gihimo sa mga konsehal, mi-walk out.
Pormal na nga mipadala og suwat si Rama kagahapon sa Bureau of Local Government Finance aron iyang pahulipan si Camarillo gumikan kay wala na siya'y pagsalig niini.(WC) (BANAT NEWS)