Notadong drug pusher sa Tabogon tiklo

CEBU, Philippines - Usa ka notadong drug pusher kinsa makahalin og P300,000 sa gidiling drugas matag semana nadakpan sa mga otoridad sa Provincial Intelligence Branch (PIB) niadtong Domingo sa gabii didto sa Barangay Poblacion, lungsod sa Tabogon.

 Ang suspetsado mao si Reynaldo Batad Arcenal, 40, taga A. Lopez, sa dakbayan sa Sugbo. Si Chief Insp. Mark Gifter Sucalit, deputy sa PIB, nagkanayon nga sa unang operasyon napakyas sila pagsikop kang Arcenal human kini makabantay kanila ug mipasirit og padagan sa iyang sakyanan.

Nasayran nga ang kapolisan sa lungsod sa Tabogon police kinsa maoy mipahibalo sa PIB sa presenya ni Arcenal sa ilang buhatan kay nagpa -blotter nga gipusil kuno siya sa mga otoridad. Diha-diha gisikop dayon sa taga PIB ang maong suspetsado.

Ang mga otoridad nakasakmit og dakong putos nga gidudahang shabu ang sulod nga gibana-banang   P15,000 ngadto sa P20,000 ang kantidad, drug paraphernalia ug laing ticket sa ayroplano nga Zest Air sulod sa kolor pulang Honda Sedan nga nagtangag sa plakang ZDR-737, nga maoy gisakyan ni Arcenal sa iyang pag-ikyas atol sa operasyon didto sa San Remegio.

Si PO3 Reynaldo Solante, kinsa maoy nangulo sa maong operasyon nagkanayon nga si Arcenal ilaha nang gipanid-an human sila makadawat og report bahin sa illegal nga kalihokan niini hangtud nga ilang giplanohan ang operasyon.

Apan sa pag-adto nila sa San Remegio nakabantay ang maong suspek ug misibat kini paingon sa Tabogon.

Gidugang ni Solante nga si Arcenal giingong molarga unta sa Manila karong adlawa base sa nahimutang sa iyang plane ticket nga ilang nakuha sulod sa sakyanan niini.

Matud ni Solante nga si Arcenal, usa ka level two drug pusher ug giingong adto kini mangompra og shabu sa Manila ug iyang ipabaligya sa mga kalungsoran pinaagi sa iyang mga drug couriers.  (BANATNEWS)