EJEEP mopuo sa traysikol

CEBU, Philippines - Gikabalak-an sa mga lider sa sektor sa mga drayber sa traysikol sa Mandaue ang pagsud sa EJEEP sa ilang dakbayan nga gipalit sa Mandaue City government sa kantidad nga tag P600 mil ang matag usa ka unit nga maoy katapusan sa traysikol sa ilang dapit.

Pipila sa wala magpailang mga tricycle driver sa maong dakbayan nagkanayon nga ang pagpadagan sa maong mga sakyanan nga libre ug wala’y bayad sa katawhan direktang kakompetensya kanilang mangayo’g plite sa mga pasahero.

"Kinsa pa may mosakay sa adunay bayad nga aduna may kasakyan nga libre?" sigun sa usa ka driver nga dili magpaila sa kahadlok nga apikihon ang iyang panginabuhian sa kagamhanan.

Gawas pa niini, wala pa usab moklaro hangtud sa pagkakaron ang administrasyon ni Mayor Jonas Cortes kun tugotan pa ba silang makapamasahero sa bag-ong merkado publiko.

Kini tungod sa kadaghan sa karsada nga dili na paagian og mga traysikol , ang mga drayber miingon nga bugtong ang mga mangomprahay na lamang sa merkado ang dako nilang gisaligan sa ilang panginabuhian.

Apan kun kini pa gyud ang initan, ang mga tricycle driver miingon nga murag maghinay-hinay nalang sila og pangitag laing kakuhaan og pamugas nga sarang ikapakaon sa ilang mga miyembro sa pamilya.

Sa nasayran nga daan nang mipahibawo si Mandaue City Administrator James Abadia nga ila nang istriktuhon ang renewal sa mga franchise sa traysikol sa Mandaue kay maoy ilang pagtuo nga 2 mil ra niini ang tinud-anay nga rehistrado samtang ang uban nahisakop na sa kolorum.

Kini ang hinungdan nga sila mihagit sa kasamtangang administrasyon nga hatagan na silang daan og sayo nga notisya sa tinud-anay nga tumong ug katuyoan kay aron ila usab kini nga pangandaman.

Kini tungod kay wala sila’y mahimo kun barugan gyud ni Mayor Cortes ang iyang kagustohan alang sa EJEEP para sa gitoohang pag-abante alang sa kalamboan ug kaayohan sa kinaiyahan, labaw sa pagtabang sa sektor sa mga tricycle driver. (BANATNEWS)