Nasaypang kawatan gipusil angol

CEBU, Philippines - Usa ka menor de edad nga lalaki ang gipusil angol sa duha ka wala hiilhing lalaki nga nagsakay og motorsiklo didto sa sitio Cabancalan sa barangay Bulacao siyudad sa Sugbo kagahapon sa alas 2:00 sa kaadlawon.

Si John Paul kansang tinuod nga ngalan gitago sa Banat News kay 15-anyos pa, nakaangkon og samad pinusilan sa bukobuko ug ang bala milapos sa iyang bukton.

Si PO3 Geoffrey Gutual sa Homicide Section sa Cebu City Police Office (CCPO) nagkanayon nga ang biktima kuyog sa iyang higala gikan nag internet café’ ug paingon na kining mopauli.

Samtang sila naglakaw sa dalan kalit lang may miabot nga motorsiklo nga gisakyan sa duha ka lalaki ug ang nag-angkas maoy mipusil sa biktima.

Matud ni Gutual nga posibling naalaan nga kawatan ang biktima sa wala mailhing kriminal.

Ang biktima bisan kun samaran nakadagan pa paingon sa ilang balay ug didto na mangayo og tabang sa iyang mga ginikanan kinsa mao nay mihatud kaniya sa tambalanan. Ang kapolisan padayon  pang naniid sa kriminal. (BANATNEWS)