Lalaki gidunggab patay sa kontra

CEBU, Philippines - Patay diha-diha ang usa ka lalaki human kini dunggaba sa makadaghang higayon sa iyang kontra didto sa Northern Poblacion sa lungsod sa San Francisco, sa isla sa Camotes alas 2:00 sa kaadlawon niadtong Domingo.

Ang biktima mao si Luciano Togonon, hingkod, ug lumad nga taga Ormoc city, apan mibalhin kini sa San Francisco pagpuyo.

Samtang ang suspek mao si Gilbert Sanduyan, 33 , minyo, nga silingan sa biktima.

Subay sa imbistigasyon sa kapolisan sa San Francisco Police nasayran nga ang biktima nagkakita ug ang suspek sa maong lugar hinungdan nga wala maglangan nagharong dayon sila. 

Kay gisubay man sa biktima ang kasungian nila nga nakapalagot pag-ayo sa suspek busa   milanit kini sa iyang kutsilyo ug gihansakan sa tiyan ang biktima.

Wala pa matagbaw ang suspek giusban pa niya sa makadaghan ug natusak   sa mga   dinunggaban ang tiyan sa biktima hangtod nga hapit na mayabyab ang tinai niini nga maoy hinungdan sa dihadiha nga pagkabugto sa iyang kinabuhi .

Matud sa mga saksi nga dihang nahagba na sa yuta ang biktima misirit usab dayon pahilayo sa maong lugar ang suspetsado ug hangtod karon gipangita pa sa kapolisan. (WC) (BANATNEWS)