Miyembro sa PhilHealth mahimo mobayad sa SM

CEBU, Philippines - Modawat na ang Philippine Insurance Corporation (Philhealth) og bayad   gikan sa membro niini nga magbinugtong pagbayad    pinaagi sa    SM Retail Inc.(SM)

Sumala sa PhilHealth circular numero 12-2011 , gibutyag dinhi nga ang SM Retail Inc. maoy nagdumala sa tanang SM department store ug SM Supermarket ug gipahigayonan kini sa tagdumala sa Philhealth og mga premium order slip nga maoy rehistrohanan sa mobayad nga membro   aron ka-isyuhan usab sila   og   resibo.

Gimando sa tagdumala sa Philhealth nga sa pagfill-up sa porma, kun mobayad na ang miyembro, kinahanglang isuwat nga klaro ang ngalan, Philhealth identification number (PIN), ngalan sa kompaniyang gitrabahoan, ug ang Philhealth employer number (PEN).

Kinahanglang isuwat usab ang buwan o ang kuwarter sa tuig nga gibayran uban ang tukmang kantidad sa gibayad nga premium.

Human sa pagbayad paabuton sa membro ang PPOS o resibo opisyal sa pagmatuod nga siya nakabayad sa iyang premium nga maoy ikapakita ngadto sa mga hingtungdang mangita niini kun mogamit siya sa iyang benepisyo sa PhilHealth.

Samtang alang usab sa mga overseas Filipino worker (OFW) mahimo na usab   silang mobayad   sa ilang premium sa PhilHealth pinaagi sa Ventaja International Corporation tungod kay akreditado na usab kini sa Philhealth.

Makahimo sila sa pagbayad sa ilang mga remittance   didto sa Hong Kong, Singapore, Taiwan, Italy, United Kingdom, Spain, Switzerland, Netherlands, Israel, United Arab Emirates, Saudi Arabia, United States of America, ug Australia.

Ang official receipt nga iluwat sa Ventaja International Corporation mao usab ang proof of premium payment nga gamiton sa membro sa panahon nga ma-admit sila sa hospital  o kaha mga dependent niini. (BANAT NEWS)