CEBU, Philippines - Nakadayeg kaayo ang mga tinun-an lakip na ang ilang mga magtutudlo sa kursong Criminology sa St. Joseph Institute of Technology sa Butuan City ug Mindanao Arts and Technological Institute (MATI) sa syudad sa Malaybalay Bukidnon sa gipakitang disiplina sa mga binilanggo sa Cebu Provincial Detention and Rehabilitation Center (CPDRC).
Si Professor Estrellita Lacuesta, Dean sa College of Criminology sa MATI mibutyag sa Banat News nga ila lang gitino ang pamaagi sa pagdisiplina sa mga piniriso sa lalawigan sa Sugbo nga na-popular na kaayong dancing inmates sa tibuok kalibotan.
Ang lihok ug ang mga posisyon uban sa kaabtik sa lawas sa mga pinirisong magkadungan gyud kanunay , maoy gitutokan nila pag-ayo sa miaging semana dihang misalida kini sa ilang atubangan.
Matud pa ni Lacuesta nga gusto nilang makat-onan ang sistema sa pagdumala ug disiplina nga gihan-ay sa tagdumala sa CPDRC ngadto sa mga binilanggo pinaagi sa mandar ni Gobernador Gwendolyn Garcia.
Samtang si Professor Marjune Millones, Dean sa St. Joseph Institute of Technology sa dakbayan sa Butuan, nagkanayon nga dako kaayo og ikatabang sa ilang mga tinun-an ang ilang gihimong cross study visit dinhi sa Sugbo kay ilang nakita sa linawas gayud ang talagsaong pag dumala sa usa ka prison correctional facility nga naghatag sa dignidad sa usa ka akusado tungod sa gipakitang kadisiplinado niini sulod sa prisohan.
Gani gumikan niini mahimong inila na kaayo karon ang maong mga dancing inmates sa CPDRC, matud niya. (BANAT NEWS)