CEBU, Philippines - Ang pagtukod og Task Force Anti-Criminality (TFAC) maoy gipanghingusgan karon ni Governor Gwendolyn Garcia nga maumol dinhi sa lalawigan sa Sugbo.
Ang tuyo sa gobernador nga mohimo usab og lakang alang niini ang mga huwes pinaagi sa pagtudlo og representante sa ilang ngalan aron mahimong sakop sa TFAC kansang tumong mao ang pagpuo sa tanang matang sa krimin nga mihasi karong panahona sa nagkalainlaing suok ning lalawigan.
Gipalanog ni Garcia ang maong laraw atol sa pagbisita sa mga huwes sa Sugbo didto sa iyang buhatan sa miaging adlaw nga gipangulohan nila ni Judge Olegario Sarmento ug Judge Macaundas Hadjirasul sa Cebu Regional Trial court .
Gipasabot ni Garcia nga sa higayong adunay molingkod nga huwes sa nahisgutang task force mas molig-on pa unya ang pamaagi sa maong grupo alang sa pagsumpo sa tanang matang sa kriminalidad dinhi sa Sugbo.
Dugang pa sa gobernador nga aduna na unyay mga dugang giya nga ikatabang ang mga huwes aron mas molig-on pa unya ang kaso nga ipasaka niini ngadto sa korte batok sa mga malapason sa balaod.
Usa sa mga kaso nga anaa na sa korte mao ang kaso ni Bella Ruby Santos uban sa uyab niini nga si Ian Charles Griffiths nga maoy gitumbok nga suspetsado sa pagdagit ug pagpatay sa 6 anyos nga bata sa lungsod sa Minglanilla nga si Ella Joy Pique.(WC) (BANAT NEWS)