CEBU, Philippines - Sa edad nga 98, mitaliwan na kagahapon si Lourdes de la Rama –Osmeña, ang inahan nila ni Kongresista Tomas Osmeña ug Senador Serge Osmeña III. Nabugto ang kinabuhi niini sa untop alas 8:45 kagahapon sa buntag sa usa ka tambalanan didto sa Bacolod.
“She was confined in the hospital for four years and in a coma last few months. Tiguwang na gyud akong mama,” nagkanayon si Kongresista Osmeña. Dugang pa niya nga sabotan pa sa ilang pamilya kung asa ilubong ang ilang inahan.
Apan nasayran nga giingong nakahisgot ang iyang inahan sa buhi pa kini nga kun mamatay siya gusto kining magpalubong sa gilubngan usab ni kanhi Senator Sergio Osmeña Jr., didto sa Bacolod, ang amahan nila ni Cong. Tomas. Si Lourdes kinsa natawo niadtong March 9, 1914, adunay lima ka anak nga sila si Tomas, Serge III, Maria Victoria “Minnie” nga nagbase didto sa New York, Esteban ug Georgia.
Ilado ang mga kabanay nga Osmeña sa tibuok Pilipinas gumikan kay nagtubo sila sa kalibutan sa politika.
Nasayran nga adunay mga katigayonan si Lourdes sa Cebu, Negros ug Manila.
Gumikan sa kamatayon ni Lourdes, giuswag na karong Disyembre sa magtiayong Tomas ug Margot Osmeña ang ilang paglarga ngadto sa Estados Unidos. (BANAT NEWS)