Landfill di pa kasirhan karon
CEBU, Philippines - Dili mahinayon karong adlawa ang hingpit nga pagpasira sa Inayawan landfill gumikan kay wala pa kapangandam pag-ayo ang kagamhanan sa dakbayan sa Sugbo.
Matud pa ni Engr. Dionesio Gualeza , hepe sa Department of Public Services (DPS) nga ilang iuswag ang pagpasira niini karong Nobiyembre 10 aron kahatagan og kasulbaran ang uban pa nga mga suliran nga gipadangat sa mga opisyales sa barangay.
Sumala pa ni Gualiza nga ila pang gitun-an karon ang ubang sistema ilabi na ang mga dagkong truck nga mokarga sa mga basura sa siyudad paingon ngadto sa Consolacion.
Nasayran nga niining higayona, magbutang ang siyudad og transfer station sa nagkadaiyang barangay aron kabutangan og basura nga hakuton usab sa mga dagkong truck ug ihatod ngadto sa basurahan sa Consolacion.
Matud pa niya nga adunay ubang barangay nga mipadayag nga gagmay kaayo ang ilang mga garbage truck nga dili makasugakod sa taas nga biyahe paingon sa Consolacion.
Una na nga mirekomendar kaniadto ang Solid Waste Management Board (SWMB) nga kinahanglang sugdan gyud sa hingpit ang operasyon sa nagkadaiyang material recovery facilities sama sa Ermita, Talamban, Luz, Mabolo, Apas, Kalunasan, Quiot ug Mambaling.
Matag adlaw ang gihimong pakigtagbo ni Mayor Michael Rama sa mga opisyales sa barangay aron makighiusa sa ilang kampanya bahin sa istriktong pag-implementar sa pagbahig sa basura tali sa malata ug dili malata. (BANAT NEWS)
- Latest
- Trending
