CEBU, Philippines - Mikabat ngadto sa P120 mil ang danyos sa nahitabong sunog kagahapon sa hapon diha sa Sunset Drive Extension, barangay Lahug, dakbayan sa Sugbo.
Sa maong sunog lima ka balay ang totally burn ug laing lima ang partially burn. Ang alarma sa sunog nadawat sa kabomberohan mga alas 4:44 sa hapon ug nakontrolar kini sulod sa pito ka minutos gikan sa pag-alarma sa mga bombero.
Sa mensahe sa text nga gipadangat ni Cebu City fire marshal Sr. Supt. Aderson Comar ang sunog naggikan sa ikaduhang andana sa balay ni Hermana Pizon.
Sa pasiunang imbestigasyon sa kabomberohan ang sinugdanan sa sunog mao ang napasagdan nga appliances sa pagpangluto. Apan si Pizon sumala pa nangangkon kining wala makadungog og buto gawas lang sa kalit nga pagdilaab sa ilang balay.
Hinuon walay gikatahong naangol sa maong insidente apan sumala pa piot kaayo ang agianan sa maong dapit maong naglisod ang mga tawo sa pagsulod-gawas palayo sa fire scene. (BANAT NEWS)