Manag-uyab gi-salvage

CEBU, Philippines - Duha ka batan-ong babaye ug lalaki nga maghinigugmaay ang napalgang patay diha sa usa ka baol ug gituohang biktima sa salvage diha sa sitio Cansubing barangay Buagsong sa lungsod sa Cordova kagahapon sa alas 3:40 sa hapon.

Ang mga biktima mao si Jenalyn Premacio, gibanabanang kapin sa 20-anyos, dalaga ug molupyo sa barangay Catarman, Cordova, samtang ang laing biktima mao ang iyang hinigugmang si Junard Balorio, 16, molupyo sa barangay Poblacion.

Matud ni PO2 Dennis Camunay, sakop sa Alert team sa Cordova Police nga miresponde sa alarma nga nakahinabi sa Banat News ang mga biktima ilang naabtan sa crime scene nga wala nay mga kinabuhi.

Sumala pa ni Camunay nga ang babaye nag-ubo nga nakagapos ang duha ka tiil og cotton (lambo) rope samtang 10-metros gikan sa gikahimutangan niini mao ang iyang uyab nga si Balorio nga wala na say kinabuhi nga naghayang.

Si Balorio nga 5’10 ang height gituohang gikan pa nag-basketball sanglit nagsuot pa kini og uniporme sa basketball apan nagtiniil nalang samtang si Premacio nagsuot og mini-skirt ug blouse apan wala na say suot sa lapalapa ug may mga pangos.

Si Sr. Insp. Noli Cernio ang hepe sa Cordova Police Station nga gikahinabi sa igsuong pamantalaan sa Banat News nga The Freeman nagkanayon nga usa sa motibong ilang gisubay mao ang illegal drugs.

Matud pa ni Cernio nga ugma untang adlawa nila sugdan ang surveillance batok sa babaye human sila makadawat og impormasyon kabahin sa pasangil nga namaligya kini og ilegal nga drugas.

Subay sa ilang imbestigasyon giingong nakit-an pa ang duha diha sa kalingawan sa barangay Poblacion ug dangtan pipila ka oras didto na usab sila makit-i sa barangay Day-as sa usa ka disko nianang Sabado sa gabii.

Nagtuo silang giguroy ang duha diha sa crime scene apan samaron na tungod sa nakit-ang mga garas sa ilang mga tikod ug lapalapa ug posibleng diha usab sila gitiwasan sa mga mamumuno.

Ang babaye giingong adunay samad pinusilan sa dughan ug liog samtang ang lalaki adunay samad pinusilan sa liog, paa ug ulo.

Giingong adunay mga molupyo nga nakadungog og tulo ka buto sa armas nianang 1:00 sa kaadlawon kagahapon gikan sa maong lugar.

Matud pa ni Cernio nga posibleng upat ngadto sa lima ka tawo ang mihimo sa krimen ug usa kanila ang nailhan na apan naghimo pa sila og dugang imbestigasyon. (Uban sa report ni Ria Mae Booc sa The Freeman/EIM)  (BANAT NEWS)