CEBU, Philippines - Gidugok sa mga mahiligon sa beer ang ika-12 nga San Miguel Beer National Beer Drinking Contest Championships kagahapon diha sa dakbayan sa Lapulapu diin pito ka mga regional champions sa tibuok nasud ang mitambong.
Nabutang sa ikaduhang pwesto ang South Luzon Area nga Samahang Magbabarkada nga miangkon sa P100,000 cash prize; ug ang nakasakmit sa 1st place mao ang Greater Metro Manila (GMA) North Area nga may ganting P200,000.
Samtang gibulsa usab sa Sweet Mama Boom gikan sa Bacolod City ang tunga sa milyong (P500,000) premyo human milupig sa unom nila ka mga kaatbang gikan sa Mindanao ug Luzon.
Ang GMA-North Luzon mitala og oras nga 47.30 segundos samtang ang South Luzon mitala og oras nga 47.44 segundos ug ang kampeyon nga Sweet Mama Boom sa Bacolod City mitala og 45.06 segundos.
Ang Central Mindanao team mao untay labing paspas nga nakahurot sa ilang lima ka botelyang SMB beers sa oras nga 43.37 segundos apan gumikan sa penalty tungod sa spillage (nausik) natagak sila sa top three ug wala na makasulod.
Samtang ang ubang teams nga miapil mao ang GMA-South Luzon Area; Central North Luzon Area ug South Luzon Area.
Atol usab sa maong championships gideklarar ang mananaog sa SMB Beer Drinking Contest Media Edition National Finals nga mao ang Team The Freeman-Cebu nga gipangulohan ni Rene Borromeo ug misakmit sa P50,000 nga ganti.
Aron paglingaw sa mga tawo, ang SMB mikuha sa mga sikat nga lokal nga banda lakip na ang gikan sa Luzon nga mao ang Rock Steady ug Brownman nga gihugyawan og maayo sa mga kababayen-an. (BANATNEWS)