CEBU, Philippines - Talandugon ang kahimtang sa usa ka lalaki human kini pusila sa wala hiilhing tawo samtang nangihi didto sa Sitio Firecrash, Barangay Bankal dakbayan sa Lapulapu sa miaging kadlawon.
Ang biktima mao si Jesus Dayot, 34, minyo, nga nagpuyo sa maong dapit apan lumad nga taga Dawis, Negros Occidental.
Sa pasiunang imbestigasyon sa kapolisan nasuta nga sa mga alas 4:20 sa kaadlawon nangihi si Dayot sa usa ka bakanteng luna duol sa ilang balay dihang kalit lang miduol kaniya ang wala hiilhing tawo ug dayong pusil kaniya.
Ang mga silingan nga nakadungog sa maong buto sa armas misusi dayon sa maong dapit diin didto nakita nila ang biktima nga nagkadugo ug nangayo og panabang kanila.
Ang biktima nga nasabak sa liog dali nga gihatod sa iyang mga silingan ngadto sa Vicente Sotto Memorial Medical Center sa dakbayan sa Sugbo.
Ang kriminal kinsa gituohan sa kapolisan nga kontra sa biktima dali kaayong nakapahilayo sa maong lugar ug mao karoy gipangita sa kapolisan sa maong dakbayan. (BANATNEWS)