Namanhig napusilan kritikal

CEBU, Philippines - Usa ka tawo kinsa mipusil angol sa iyang silingan nailogan   sa iyang armas ug napusilan usab siya sa tiyan niadtong Biyernes sa gabii didto sa sitio Lawis, barangay San Antonio, dakbayan sa Toledo, busa anaa siya karon sa kritikal nga kahimtang.

Ang biktima sa pagpamanhig mao si Cristoto Pialago, 22, ulitawo nga taga San Antonio, samtang ang suspetsadong namanhig mao si Marcelino Narsiko, 44, minyo nga silingan sa biktima.

Si SPO4 Gil Lastimosa sa Toledo City Police Station mibutyag sa Banat News nga   si Pialago naglakaw paingon   sa ilang balay sa alas 9:00 sa gabii dihang giatangan siya ni Narsiko.

Kumo kay wala makabantay, nasabak si Pialago sa   wala ug tuo niyang bagtak.

Apan bisan samaron misukol si Pialago ug nakiglayog kang Narsiko   hangtod nga nailog niini ang armas sa naulahi ug dihang iyang gipabuto nabuslot ang tiyan ni  Narsiko.

Hinuon tungod kay taas og ginhawa   misibat si Narsiko apan pag-abot niya sa ilang balay gihatod siya sa   iyang igsoon nga si Pablo Narsiko ngadto sa Balamban District Hospital apan gibalhin usab dayon sa tambalanan sa dakbayan sa Sugbo tungod sa katalandugon sa iyang samad pinusilan.

Si Pialago   kinsa samdan lang sa duha ka paa didto ra patambali sa Toledo City District Hospital

Gipaabot sa kapolisan kun kinsay unang mosang-at og kiha tali ni Pialago ug Narsiko. (WC)  (BANATNEWS)