Kapitolyo padumalahon sa North terminal
CEBU, Philippines - Gitun-an na karon sa buhatan ni Governor Gwen Garcia ang hangyo ni 4th district provincial board member Sun Shimura nga ang kagamhanan sa lalawigan sa Sugbo maoy modumala sa Cebu North Bus Terminal.
Kini aron matagamtaman usab sa kalungsoran sa Amihanang bahin sa lalawigan sa Sugbo ang kahamugaway ug maayong sistema nga gipatuman sa gobernadora sa Cebu South Bus Terminal.
Matud pa ni bokal Shimura nga naibog siya sa kaanindot sa facilities sa South Bus Terminal ug buot usab siya nga matagamtaman usab ang susamang proyekto sa taga Norte nga bahin sa probinsiya sa Sugbo.
Si Shimura misaad nga mopalabang og resolusyon alang sa pagtuman sa iyang plano.
Si Garcia sa iyang bahin mitumbok nga dili siya magpanuko sa pagtuman sa maong hangyo sanglit makabenepisyo man usab kini sa mga molupyo sa Amihanang bahin sa lalawigan sa Sugbo.
Hinuon, gitataw sa gobernadora nga magkinahanglan pa kini og makuting pagtuon sa dili pa kini hingpit nga mapatuman. (BANATNEWS)
- Latest
- Trending
