CEBU, Philippines - Gikondenar sa grupong Ang Ladlad Partylist ang nahitabong pagpangrakrak og pellet guns sa pipila ka mga bayot niadtong miaging buwan sa usa ka kan-anan sa barangay Labangon ning dakbayan.
Kini na maoy ikaduhang susamang insidente dinhi sa dakbayan sa Sugbu ug ang unang higayon diha nahitabo sa Mango Avenue dihang usa ka SUV nga tinted ang kolor sa samin nga giluwanan og kalalakin-an miagi sa tungod sa grupo sa mga naglakaw nga mga bayot ug kalit silang gipaulanan og pellet sa airsoft gun.
Ang Ladlad nanawagan sa lokal nga opisyales ug kapolisan sa Sugbo nga mohimo og lakang aron mahunong na ang mga bangis nga pagpanghilabot sa mga bayot, tomboy ug transgender.
Nasayran gikan sa usa ka biktima nga si Nicolet Carla Reyn, (di niya tinuod pangalan) nga niadtong Oktubre 13 ning tuiga siya ug iyang mga higala nangaon sa Sinangag Station sa barangay Labangon dihang kalit silang gihunongan sa tungod sa usa ka puting sakyanan ug girakrakan sila sa mga sakay og BB pellets gamit ang airsoft gun.
Pipila kanila ang nangaigo ug nanglabhag ang ilang mga panit sa igo sa BB pellets tungod kay pulos sila wala makabantay. Human niadto daling mipasirit ang maong sakyanan nga dihang ilang gitan-aw walay plaka gawas sa “For Registration” lang.
Matud pa sa Senior Political Adviser nga si Boy Abunda nga hilabihan siya nga nakurat sa maong panghitabo.
“Ako’y talagang nasaktan nang sobra. Nabagabag, nasaktan at nainsulto ako kung sino man ang gumawa nito, bakit may mga taong natutuwa na makakitang may taong masaktan?” matud pa ni Abunda. Butyag pa ni Abunda nga sa iyang pagkaila sa Sugbo usa ka malamboon nga syudad diin wala siya magdahom nga adunay susamang pagpanghilabot sa mga bayot nga nahitabo.
Midugang si Abunda nga ila gyud nga gituyo og ari ang Sugbo aron awhagon ang mga awtoridad sa paghimo og lakang aron mahunong na kini.
“This must stop, walang sinuman sa Cebu o sa Pilipinas ang may karapatang saktan tayo,” matud pa ni Abunda.
Samtang ang chairman sa Ladlad Partylist nga si Bemz Benedito mipadayag usab sa iyang kasagmuyo sa nahitabo.
“This is very alarming, if we don’t act now, maybe next time the culprits will use real gun. We demand an investigation and bring the perpetrators to justice,” matud pa ni Benedito. (BANATNEWS)