Fluvial sa Birhen sa Regla karong Nob.12

CEBU, Philippines - Gikatakda karong Nobiyembre 12 ang pagpahigayon sa fluvial procession sa Birhen sa Regla nga patron sa dakbayan sa Lapulapu.

Si kanhi Lapulapu City councilor Damian Gomez nga maoy chairman sa Lapulapu City Tourism Commission ug maoy nangulo sa pagpangandam miingon nga alas- 7 ang takna sa buntag sa maong adlaw magsugod ang fluvial procession nga matapos sa Mulle Osmeña Wharf sa barangay Poblacion sa maong dakbayan.

Dugang pa niya nga ang imahen sa Birhen sa Regla kuhaon sa hapon sa petsa 11 sa Nobiyembre gikan sa simbahan sa barangay Poblacion ug dad-on kini ngadto sa barangay Marigondon. Pagkasunod adlaw dad-on ang imahen ngadto sa Pacific Beach Resort sa Suba-Basbas diin manukad ang fluvial procession.

Gilauman sa mga opisyal sa maong dakbayan nga ang fluvial procession karong tuiga maoy labing daghan nga motor banca ug mga nagkadaiyang matang nga mga sakyanan sa kadagatan nga mokuyog.      

Gikan sa Suba Basbas ang barko nga luwanan sa imahen molawig sa kadagatan atbang sa Olango Island padulong sa barangay Agus ug mopadayogdog pagpaingon sa kadagatan sa barangay Mactan ug hangtod na sa pagsulod sa Mactan Channel.

Mopadayon sa iyang paglawig ang imahen sa Birhen sa Regla ug molabay kini sa kadagatan sa barangay Buaya, barangay Ibo, hangtod na ngadto sa barangay Pusok ug mapidpid sa kadagatan sa barangay Pajo, ug adto kini modunggo sa Mulle Osmeña Wharf sa barangay Poblacion nga nahimutang usab sa luyong bahin sa iyang gigikanan nga simbahan sa barangay Poblacion.

Si Mayor Paz Radaza ug Kongresista Arturo Radaza ug mga opisyal sa kagamhanan sa maong dakbayan uban sa kaparian ug mga pundok sa relihiyosong katilingban sa dakbayan maoy mosugat sa imahen sa Birhen ug dad-on kini og balik ngadto sa sulod  sa nahisgotang simbahan. (EIM) (BANATNEWS)