Overloaded nalunod

CEBU, Philippines - Usa ka motorbanca nga adunay luwang daghang pasahero gikan sa Bohol ang nasudlan og tubig ug wala na makapadayon sa ilang biyahe pag-abot diha sa kadagatan sa Calitoban ug Hilutungan Island sa lungsod sa Cordova alas-2 pasado ang takna sa miaging kaadlawon.

Si Cebu Coast Guard Station Commander Rolando Punzalan miingon nga ang motorbanca mao ang MB Ardie Express nga giingong adunay wala pa matinong gidaghanon nga pasahero sanglit walay narekober nga manipesto sa maong bangka.

Matud pa niya nga ang laing motorbanca nga MV Anjon nga nahiagi sa maong dapit maoy unang nakabangal sa maong pumpboat nga nagpautaw-utaw nalang sa dagat human nasudlan og tubig ug maoy miluwas sa mga pasahero.

Gikatahong gikan sa Guindakopan Island sa Calape, Bohol alas-7 sa gabii ang maong pumpboat paingon unta sa Pasil Fish Port sa dakbayan sa Sugbo nga may dalang isda ug daghang mga pasahero. Base sa mga balita sa radyo ug sa Buena Mano sa GMA News kagahapon kapin 30 ngadto sa 50 ka pasahero ang sakay sa maong pumpboat apan wala pa kini kumpirmasyon gikan sa mga awtoridad.

Sagad sa mga pasaherong nangabot diha sa Pasil Fish Port nangabasa maong naglisod ang PCG sa pagkuha og dugang impormasyon sa nahitabo. Si Punzalan miingon nga base sa mga pakisusi nga ilang gihimo narehistro kini sa Maritime Industry Authority (Marina)-7 nga cargo vessel hinungdan nga ilang giisip nga ilegal ang pagpasakay niini og mga pasahero.

Si Dantos Lumod nga maoy operator sa maong motor banca nga nahinabi sa mga tigbalita mihimakak nga nakaabot og 100 ka pasahero ang ilang sakay atol sa pagkalunod niini.

Sumala pa niya nga mokabat lamang sa 30 ka mga pasahero ang ilang sakay apil na ang ilang mga tripulante.

Si Lumod miingon nga maayo ang ilang pagbiyahe gikan sa isla sa Guindakopan ug walay kakulian sa panahon apan ang panghaw sa ilang motorbangka nga gawsanan sa tubig naabtan sa dagat ug dihang mikagar ang pump napuno na sila og tubig ug napagngan sa makina. Nasuta usab nga dili lang ang maong pumpboat maoy nasakpan sa PCG diha sa Pasil nga nagdala og mga pasahero kagahapon. (BANATNEWS)