Dept.heads sa CH mi-walkout sa budget hearing

CEBU, Philippines - Nang-walk out ang tanang mga department heads sa budget hearing kagahapong adlawa diha sa Konseho kalabot sa pagtuki sa budget proposal ni Mayor Michael Rama alang sa 2012 nga moabot ngadto sa P11.8 Billion.

Nasayran nga mihimo unta og break nga 10-minutos ang maong budget hearing apan kalit lang nag-anam og panggawas ang mga department heads.

Dangtan pila ka gutlo nasayran nalang sa mga sakop sa Konseho nga gipatawag diay sila alang sa usa ka emergency meeting sa buhatan ni Mayor Michael Rama.

Apan ang mga department heads wala na sila mamalik sa budget hearing subay sa kamandoan sa mayor.

Nagkanayon si Rama nga nainsulto siya pag-ayo sa gibuhat sa Konseho gumikan kay ang usa sa gihatagan niya og awtoridad nga modepensa sa budget wala patingoga sa mga konsehal.

Matud pa ni Rama nga si Assistant City Treasurer Emma Villarete maoy iyang gimandoan nga modepensa apan ang gipatingog sa konseho mao si City Treasurer Tessie Camarillo nga iyang gihulagway nga wala na niya saligi.

Dugang pa sa mayor nga dakong insulto alang kaniya ang gibuhat sa konseho gumikan kay imbes tagaan og tsansa ang executive department nga modepensa, mura na hinuon kini og nag-imbestigar.

Samtang si Bise Mayor Joy Augustus Young nakaingon nga angayan lang nga nainsulto si Rama gumikan kay tataw na hinuon kaayo nga komedya ang budget proposal sa mayor.

Si Konsehal Alvin Dizon misaway sa pag-walkout sa department heads. “The walk out is such an unpleasant move, It’s blatant sabotage of a democratic process requiring check and balance between executive and legislative department especially on a very important matter which is budget,” sumala pa ni Dizon. (BANATNEWS)