CEBU, Philippines - Ang buhatan sa Talisay City Veterinarian higpit nga nag-monitor kabahin sa mga karneng palusot o wala ihawa diha sa ihawan sa siyudad ilabi na niadtong mga double dead ug mga imported meat.
Si Talisay City Administrator Richel Bacaltos nga nahinabi sa Banat News kagahapon nagkanayon nga ang city veterinarian kanunay sa ilang operasyon batok sa mga palusot nga karne sa kamerkadohan sa siyudad pinaagi sa mga inspection diha sa merkado sa Lagtang ug ngadto sa mga satellite markets.
Kahinumduman nga sa milabay’ng mga buwan sobra sa napulo ka kilong mga dressed chicken ug imported nga mga karneng baboy ang naembargo sa mga inspectors tungod kay ang mga namaligya wala motuman sa rekisitos.
Si Bacaltos nagkanayon nga ang mga imported nga karne kinahanglan gyud ibutang sa freezers aron dili mohumok ug dugokon sa bacteria nga makadaot sa panglawas sa tawo.
Hinuon matud usab niya nga mga 30 ka mga stall holders diha sa bag-ong merkado sa Lagtang ang duna nay mga freezers nga kabutangan sa mga imported nga karne.
Ang maong mga stall holders mihangyo sa siyudad nga magpabutang og koneksiyon sa kuryente aron makabutang og mga freezers.
Ang siyudad mihatag og lahing kontrata sa maong koneksiyon sa kuryente diin sa maong kontrata wala itugot nga dunay laing stall holders ang mokabit og kuryente alang sa freezers.
Niining nagsingabot nga Pasko ug Bag-ong Tuig gilauman sa siyudad nga modaghan ang mga magpaihaw og mga hayopan sa ihawan apan doble usab ang ilang higpit nga pag-monitor sa kamerkadohan aron walay makalusot nga mga hot meat. (BANATNEWS)