Rama di patambungon sa budget hearing - Young

CEBU, Philippines - Gitambagan ni Bise Mayor Joy Augustus Young si Michael Rama nga dili na lang kini motambong sa ipahigayong unang budget hearing karong adlawa alang sa local budget committee nga naglangkob sa City Treasurer’s Office, City Planning Office ug City Budget Office.

Sumala pa sa bise mayor nga maglisod gyud og pagpasabot ang mga nangulo sa nahisgutang mga departamento kalabot sa target nga budget ni Rama sunod tuig nga moabot ngadto sa P11.8 Billion.

Nagkanayon si Young nga naglisod gani ang siyudad sa pagkuha og P4.45 Billion nga budget karong tuiga busa imposible kaayo ang giduso nga budget proposal ni Rama alang sa 2012.

Ubay-ubay nga ipahigayon nga budget hearing kung lain-laing mga departamento ang imbitahon aron modepensa sa ilang budget proposal.

Gustong tukion ni Young kung asa   kuhaon ang dakong budget nga giduso ni Rama sanglit hanap kaayo kini alang kaniya.

Apan si Rama misaysay kagahapon nga dili siya segurado kung motunga ba siya karong adlawa sa budget hearing sanglit aminado siya nga kabalo na modepensa ang iyang mga department heads.

Kahinumduman nga ang mga department heads mihimo og nagkadaiyang tigom sulod sa pipila ka mga adlaw isip preparasyon sa pagpasabot sa ilang budget proposal.

Una nga   gipadayag sa mayor nga ang alang sa kaayohan sa katawhan ang giduso niya nga budget. Samtang uyon usab si Rama sa sugyot ni Konsehal Alvin Dizon nga ipasalida nga live sa internet ang naglinya nga mga budget hearings.

“Maayo man na siya nga idea, aron makahibalo gyud ang mga tawo kung para asa gyud ang budget nga akong gi-propose,” sumala pa ni Rama. (EIM) (BANATNEWS)