CEBU, Philippines - Gibasura sa korte ang mosyon sa kagamhanan sa siyudad sa Sugbo ug mimando hinuong pabayran ang ilang utang ngadto sa mga sumusunod ni Rev. Fr. Vicente Rallos alang sa kompensasyon sa luna nga ilang gigamit isip public road.
Si Regional Trial Court (RTC) acting Judge James Stewart Ramon Himalaloan sa Branch 9 mibasura sa mosyon nga giduso sa City of Cebu nga naghangyo nga i- quash ang writ of execution ug ipabaliwala ang notice of garnishment nga gisang-at sa mga Rallos.
Samtang gibasura usab ni Himalaloan ang motion to strike out o expunge urgent omnibus motions nga giduso sa counsel sa mga Rallos.
Mipasabot si Himalaloan nga dili siya makapanghilabot sa ruling sa higher court tungod kay gideklarar naman kini nga final and executory.
“A judge cannot amend a final decision, more so where the decision was promulgated by an appellate court. Judges should respect the orders, resolution and decisions of higher courts, specially the highest court,” tipik sa jurisprudence nga nakutlo ni Himalaloan
Mipasabot usab si Himalaloan ang lower court kinahanglan nga mosunod sa desisyon sa higher courts ug wala usab silay hurisdiksyon aron amendahan ang ruling sa higher court.
Tungod niini si Sheriff Eugenio Fuentes Jr. gihatagan og awtoridad sa pagpadayon sa pag-implementar sa writ of execution ug ang notice of garnishment batok sa City of Cebu.
Matud pa ni Fuentes nga ang dakbayan sa Sugbu napakyas sa pagbayad sa money judgment nga nagkantidad sa P133,469,962.55.
Apan si Mayor Michael Rama niadtong milabay’ng adlaw miasoy nga magpadayon ilang legal battle sa maong isyu.
Una nang mipasidaan ang kagamhanan sa siyudad sa Sugbo sa mga bangko nga gidepositohan sa salapi sa siyudad nga dili mo-release sa ilang salapi ngadto sa pamilyang Rallos.
Si City Attorney Joseph Bernaldez mipadala gyud og suwat ngadto sa mga manager sa bangko nga gidepositohan og kuwarta sa dakbayan ug mipasidaang adunay legal nga aksyon ang syudad kung dili sundon sa mga bangko ang mando sa siyudad isip depositor. (BANATNEWS)